ميانمار کې پوځ د نويو ټاکنو ژمنه کړې، خو اعتراضونه دوام لري
د عکس سرچینه، Getty Images
د ميانمار يا بارما پوځ يوه وياند ويلي چې پوځيان به تر ډېره په واک کې نه وي او ژمنه يې کړې چې د ټاکنو له ترسره کېدو وروسته به واک ګټونکي ګوند ته سپاري.
د پوځ دغه وياند جنرال زاو مېن ټون په خبري کنفرانس کې هڅه کوله، چې دوې اوونۍ مخکې د ملکي حکومت پرځولو پرېکړې سپيناوی وکړي او له کومو بېلګو پرته يې دعوا کوله چې د تېر نومبر ټاکنو کې درغلۍ شوې وې.
پوځي چارواکو لا نه دي ويلي چې ټاکنې به کله کوي.
د ميانمار پوځ دا ژمنه په داسې حال کې کړې چې د دغه هېواد په لويو ښارونو کې احتجاجونه لا روان دي.
وړاندې ملګرو ملتونو د میانمار پوځي چارواکو ته خبرداری ورکړی چې د سوله ییزو غونډو حق ته درناوی وکړي.
د دې ادارې ویاند کریسټین شارنر بورګنر زیاتوي، مخالفانو ته هر ډول توند غبرګون به د میانمار پوځي چارواکو ته بدې پایلې ولري.
دا خبرداری له هغه وروسته دی چې میانمار کې له دوو پرلپسې شپو راهیسې انټرنېټ نشته، خو هر سهار بیا نېټ نښلول کېږي.
د عکس سرچینه، Reuters
تر دې مخکې د ملګرو ملتونو ځانګړي رپورټر اېم انډروز ویلي و چې د معترضانو د کنترول لپاره د حکومت نوې او زیاتېدونکې هڅې خواشینوونکې او د ولس پر ضد د جګړې په مانا دي.
د ميانمار يا برما پوځ په ټول هېواد کې د کودتا ضد لاريون کوونکو ته ګواښ کړی، چې که د وسله والو ځواکونو پر وړاندې خنډ وګرځي، کېدی شي تر ۲۰ کلونو پورې په بند محکوم شي.
پوځ همدا ډول ويلي، د هغو کسانو په اړه چې د کودتا مشرانو په اړه يې "کرکه يا سپکاوی" ته هڅونه کړې هم اوږدې سزاوې او جرمانې ولګول شي.
دغه بدلونونه په داسې حال کې اعلان شوي، چې د دې هېواد د څو لويو ښارونو پر سړکونو د پوځيانو موټر ګرځي او داسې ښکاري چې د فبرورۍ لومړۍ نېټې کودتا وروسته د مخالف ګوند سياسي پلويانو پر خلاف د عملياتو تياری کېږی.
په وروستيو ورځو کې په زرګونو خلکو په دې لاريونو کې برخه اخيستې وه او له تېرې شپې راهيسې انټرنېټ هم تړل شوی دی.
د ميانمار په شمالي کاچن سيمه کې تېره ورځ امنيتي ځواکونو په لاريون کوونکو ډزې کړې وې. دا په دې هېواد کې د پوځي کودتا پر وړاندې د مظاهرو نهمه ورځ ده.
د ملګرو ملتونو يوه کارکوونکي ميانمار کې پر پوځ تور لګولی چې د "خپلو خلکو پر ضد يې جګړه" پيل کړې ده.
د ميانمار لپاره د ملګرو ملتونو ځانګړی استازی ټام اينډريوس وايي، له دې "کلکو ګامونو په پوځي جنرالانو کې د وېرې نښې ښکاري". نوموړی زياته کړې چې د دغو جنرالو سره به "حساب" کېږي.
د عکس سرچینه، Reuters
په دې هېواد کې د لوېديځو هېوادونو سفارتونو له پوځ د زغم ښودلو غوښتنه کړې ده، د اروپايي ټولنې، بريتانيا او امریکا په ګډه لاسليک شوي بيان کې راغلي، "موږ پر امنيتي ځواکونو غږ کوو چې پر لاريون کوونکو له تاوتريخوالي ډډه وکړي، دوی د خپل مشروع حکومت د ړنګېدو له امله لاريون کوي".
په ميانمار کې د پوځ له کودتا وروسته د انګ سان سوچي حکومت وپرځول شو، د دې حکومت د نومبر مياشتې ټاکنې په غوڅ اکثريت ګټلې وې، خو پوځ په ټاکنو کې د درغليو تورونه ولګول او کودتا يې وکړه.
انګ سان سوچي اوسمهال په خپل کور کې کلابنده ده. ګڼ مدني فعالان او د اپوزيسیون مشران هم نيول شوي دي.
