تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د سعودي یوه بندر کې تېل وړونکې بېړۍ کې چاودنې سره اور ولګېد
د ماڼوګرۍ یا بېړۍ چلولو هافنیا شرکت وايي، د ناپېژاند بهرني شي له امله د سعودي په جده بندر کې یوه بېړۍ کې چاودنه شوې او اور لګېدلی دی.
دغه شرکت د بیانیې خپرولو سره د بېړۍ نوم بي ډبلیو بللی او ویلي یې دي چې د سینګاپور بیرغوالې دې بېړۍ د جدې ښار بندر کې خپل بار کوزاوه:
ځايي وخت له نیمې شپې وروسته دا بېړۍ له برید سره مخ او اور پکې ولګېد، خو ټول ۲۲ ماڼوګان په وخت ترې ووتل.
په خلیج کې د بریتانیا سمندري ځواکونو تر نظر لاندې د بریتانیا د سمندري او سوداګریزو چارو سازمان دا پېښه ارزوي او سیمه کې یې بېړیو ته خبرداری ورکړی چې پام وکړي.
تېره میاشت هم د سور سمندرګي په غاړه کې د سعودي یوه ترمینل کې چاودنې یوه تېل وړونکې بېړۍ زیانمه کړه.
سعودي چارواکو حوثي وسلوال او ایران په دې پېښه کې پړه وبلل.
د سعودي په مشرۍ یمن کې جنګېدونکې ټلوالې هغه مهال وویل، یو "ترهګریز برید" یې شنډ کړی او د سعودي په شقیق بندر کې د مالټ بیرغواله دا بېړۍ لږ زیانمنه شوې ده.
سیپۍ ډوله ماینونه
تېر نومبر د سعودي په مشرۍ ټلوالې د سور سمندرګي سوېل ته د پنځو سمندري بمونو د شنډولو خبره وکړه چې د دوی په خبره، حوثي وسلوالو ایښي وو.
د دې ټلوالې قومنداني وویل، دا سمندري ماینونه ایران جوړ کړي او د سیپۍ یا صدف کورنۍ دي.
ایران وايي، حوثي وسلوالو ته وسلې او مهمات نه ورکوي او یوازې معنوي ملاتړ یې کوي.
د ملګرو ملتونو کارپوهان وايي، د یمن له حوثیانو سره وسلې په ایران کې جوړو وسلو ته ورته دي.
ملګري ملتونه ایران د یمن له حوثیانو سره په بې قانونه مرستې تورنوي.
یمن کې له حوثیانو سره د مقابلې لپاره د سعودي او ملګرو هېوادونو د برید له پیلیدو تر پنځو کلونو ډېرې تېريږي، چې له امله یې لوی انساني ناورین جوړ شوی او ډېرو ولسي وګړو پکې ژوند له لاسه ورکړی دی.
