کورونا وېروس: هند کې د کوویډ - ۱۹ ناروغانو شمېر یو میلیون ته ورسېد

په هند کې تېرو ۲۴ ساعتونو کې پر کورونا وېروس د نویو اخته شویو ۳۵ زره کسانو له نومونو ثبت کېدو سره دغه هېواد کې د ناروغانو شمېر اوس تر یو میلیون کسانو اوښتی دی. د ناروغانو شمېر له پلوه اوس هند په ټوله نړۍ کې له امریکا او برازیل وروسته دریم ځای ته رسېدلی دی او د نړۍ په هغو دریو هېوادونو کې شامل شوی، چې د ناروغانو شمېر پکې یو میلیون کسانو ته رسېدلی دی.

هند کې چارواکي د ټولټال شمېر درېیمه برخه ناروغان اوس هم پر ناروغۍ اخته بولي، ځکه په وینا یې دغه هېواد کې د وېروس له کبله د مړو کسانو شمېر هم لږ دی او ډېری کسان بېرته رغېدلي دي.

خو بل لور ته شمېرې ښيي چې د کورونا وېروس له کبله د مړو شمېر په ډېرېدو دی او د کوویډ - ۱۹ له کبله د ۲۵ زره ۶۰۲ کسانو له مړینې سره هند په نړۍ کې د کورونا مړینې شمېر له پلوه اتم ځای ته رسېږي.

بل لور ته له تېرو څو اونیو راهیسې په هند کې هره ورځ د نویو ناروغانو ریکارډ کچه زیاتوالی ثبتېږي. په نړیواله کچه د روانې میاشتې لومړیو کې هند د ناروغانو شمېر له پلوه له روسیې مخکې شو.

امریکا کې په یوه ورځ دنږدې زر کسانو مړینه مړه

د جان هاپکنز پوهنتون د شمېرو له مخې د امریکا متحده ایالتونو کې په تېرو ۲۴ ګړیو کې له کووېډ-۱۹ ناروغۍ نږدې زر کسان مړه شوي دي.

دې سره د هغو کسانو شمېر یو لک ۳۸ زرو ته ورسېد چې دغه هېواد کې له دې ناروغۍ مړه شوي دي.

د جان هاپکنز پوهنتون تازه شمېرې ښيي چې متحده ایالتونو کې تېرو ۲۴ ګړیو کې په کورونا وېروس څلور اویا زره پنځه سوه کسان اخته شوي.

دا د کورونا وبا له پیلېدو راهیسې اول ځل دی چې دومره ډېر امریکایان په یوه ورځ په کورونا اخته کېږي.

دې سره امریکا کې په کووېډ-۱۹ ناروغۍ د اخته کسانو شمېرو له درې میلیونه، پنځه لکه اویا زرو پورته کېږي.

نړۍ کې په کورونا د اخته کسانو او ترې د مړو کسانو له پلوه امریکا متحده ایالتونه تر ټولو ځپلی هېواد دی.

دا مهال د امریکا په ۳۰ ایالتونو کې کورونا وېروس په زیاتېدو دوی او ډېرو ایالتونو کې د ماسک اغوستلو غوښتنه شوې ده.

وروستیو کې د کلوریډا والي جارډ پولس امر کړی چې دغه لوېدیځ ایالت کې له لسو کلونو پورته کسان عامه ځایونو کې ماسک واغونځي.

تېره اونۍ ډونلډ ټرمپ هم د اول ځل لپاره ماسک واغوست.

* له کورونا وبا سره موږکان ولې خطرناک شوي؟

* کورونا وروستۍ وبا ده که نورې هم پسې راځي؟

کورونا نړۍ کې تراوسه دیارلس میلیونه او اوله لکو ډېر کسان نیولي او ترې پنځه لکه ۸۹ زرو ډېر کسان مړه شوي دي.

د روغتیا نړیواله اداره وايي، که ځینې حکومتونه د کورونا وېروس د خپرېدو د مخنیوي لپاره پرېکند ګامونه پورته نه کړي، نو حالات به لا خراب او بدتر شي.