مشهوره امریکایۍ سندرغاړې دیلا مایلز مسلمانه شوې

امریکایۍ مشهوره سندرغاړې دیلا مایلز په نیوزیلنډ کې پر دوو جوماتونو تر خونړیو بریدونو وروسته، د ترکیې استانبول ښار کې، چې د سندرو د کانسرټ لپاره تللې وه، مسلمانه شوې ده.

مایلز د امریکا پاپ سندرو له نړیوال ستوري مایکل جکسن سره د یوځای سندرو تجربه لري، د ترکیې استانبول ته د یوه هنري محفل او ځینو نورو کارونو لپاره تللې وه.

هغې پر خپل انسټاګرام، خپل ځینې انځورونه خپاره کړي چې د ترکیې استانبول مشهور تاریخي احمد جومات د ننه په حجاب کې ولاړه ده.

هغې یوه وېډیو هم خپره کړې ده چې د مسلمانېدو پرمهال د شهادت کلمه وايي.

دا وايي، استانبول کې چکر یې ذهنیت بدل کړ او ترکیه یې ډېره خوښه شوه، همدا وو چې د پېر پرمهال یې د ترکیې بیرغ هم واخیست.

نوموړې په نیوزیلنډ کې پر جوماتونو د خونړیو بریدونو په غبرګون کې ویلي: "اسلاموفوبیا په نړۍ کې د ناروغۍ په څېر خپرېږي، چې تر ټولو وحشیانه بېلګه یې د نیوزیلنډ پېښې دي، دې پېښې زما رګونه وچ کړل او غړي مې وتښتېدل."

دا وايي: "د اوسنۍ زمانې ناروغي د مینې او نورو ته د درناوي په نشتوالي کې ده، خو اسلام د مینې او بښنې دین دی او زه پر خپلې پرېکړې خوشاله یم."

د ژوند بڼې بدلولو په هڅه کې

د ترکیې "حریت" ورځپاڼې د دغې امریکایۍ سندرغاړې له خولې ویلي، له ډېر وخت راهیسې یې غوښتل د خپل ژوند بڼه بدله کړي، له یوه کال راهیسې یې د اسلام مطالعه کول پیل کړي وو.