تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د ځمکې ګرمېدو په اړه اندېښنې لاپسې ډېرې شوې
د شاوخوا ۲۰۰ هېوادونو استازو د پولنډ کاتوویتسا کې د اقلیم له بدلون سره د مبارزې لپاره دوه اونۍ ناسته پیل کړې.
د ډېرو جزیاتو په اړه د تصمیم نیولو په موخه دا ناسته له ټاکلې نیټې یو ورځ مخکې پیل شوې ده.
د ځمکې د اوبو او هوا ګرمېدو په اړه پاریس کې د ۲۰۱۵ کال له غونډې وروسته دا د ملګرو ملتونو تر ټولو مهمه ناسته په ګوته شوې.
خو ویل کیږي پوره تمه نه شي کیدی چې دا غونډه هم د خلکو ژورې اندېښنې لرې کړي. په ځانګړې توګه هغه چې په تېرو دوه اونیو کې د ګلتوني ګازونو او د ځمکې زیاتې تودوخې په اړه د خلکو اندېښنې ډیرې شوې دي.
ښايي دا اندېښنه له دې پلوه وي چې برازیل د ۲۰۱۹ کال کلنۍ ناستې له کوربتوب ډډه وکړه.
د برازیل ښي اړخی افراطي ولسمشر جایر بولسونارو- چې نوی ټاکل شوی- په ارجنټاین کې په جي ۲۰ ناسته کې هم تاکید وکړ چې برازیل به د اقلیم بدلون له تړون نه ووځي.
د ملګرو ملتونو د اقلیم بدلون د تړون مشر پاتریشیا سپینوزا دا کنفرانس مهم بولي او ووايي: اوسمهال ښکاره نښې شته چې ښيي د اقلیم بدلون ستونزې هوارولو ته جدي اړتیا ده.
بلخوا د فرانسې د پخواني لومړي وزیر په ګډون د ملګرو ملتونو د اقلیمي بدلون پخوانیو غونډو مشرانو په ګډه بیانیه کې د ځمکې د هوا ګرمېدو پروړاندې د کوټلو ګامونو غوښتنه کړې ده.
"دنیا حساس پړاو کې ده او له نژدې ګواښونو سره د مقابلې لپاره راتلونکو دوه کلونو کې کوټلي ګامونه پورته کول بنسټیز ارزښت لري "
په یوه کال کې ۱۸۰ هېوادونو په لږ وخت کې د پاریس تړون تصویب کړ، خو تر ۲۰۲۰ کال به اجرايي نه شي.
د دې تړون په بنسټ به د ځمکې د تودوخې کچې محدودولو لپاره د ګلتوني ګازونو تولید تر ۲۰۴۵ کاله ۴۵ سلنې ته را کم شي.
خو څېړنې ښيي چې له څلور کاله درېدو وروسته، د شینکوریزو ګازونو تولید بیا ډېر شوی دی.
د پولنډ دغه ناسته داسې مهال کیږي چې د پاریس تړون د اجرايي کېدو لپاره د مقررو او جزیاتو د تدوین ضرب الاجل د روان کال تر پایه یا یوه میاشت وروسته پوره کیږي.
که څه هم امریکا د اقلیم بدلون له تړون وتلې خو تر ۲۰۲۰ کال باید په دغه تړون کې پاتې شي.
امریکايي مرکچیانو د پولنډ ناسته کې ګډون کړی چې د دې غونډې په اجرايي جزیاتو پوه شي او په خپل بهرني سیاست کې ترې ګټه واخلي.
د ډبرو سکرو ته د امریکا د ولمسشر ټرامپ زیاتې لېوالتیا ته په کتو، ویل کیږي سپینه ماڼۍ به د فسیلي موادو سوځولو تبلیغ په څنډه کې یوه ناسته جوړه کړي.
په پخوانۍ ناسته کې دې ته ورته کار د یو شمېر کسانو اعتراضونه را پورته کړي و.
