د سپینې ماڼۍ مخې ته یو سړي ځانوژنه کړې
د عکس سرچینه، .
د امریکا د پټو خدمتونو سازمان ویلي، واشنګټن کې د سپینې ماڼۍ مخې ته یوه سړي خپل ځان په ډزو وژلی. نوموړی د سپینې ماڼۍ شاوخوا پنجرو ته نژدې شوی او بیا یې ځان وژلی دی.
د دغه سړي په اړه تر اوسه معلومات نه دي په ډاګه شوي، خو پولیسو منلې چې نورو خلکو ته په ډزو کې زیان نه دی اوښتی.
د یادې ادارې په وینا، دغه سړي د شنبې په غرمه کې سپینې ماڼۍ ته نژدې شو، تومانچه یې له جیبه راوویسته او پر ځان یې ډز وکړ.
د پېښې پرمهال ولسمشر ډونلډ ټرمپ او د هغه مېرمن میلانیا په سپينه ماڼۍ کې نه وه، هغوی فلوریډا ته تللی ول او د شنبې پر مازدیګر بېرته پلازمېنې ته ستانه شول.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
لکه څنګه چې د واشنګټن د ورځپاڼې په راپور کې راغلي، دغه کس د خلکو ترمنځ خپله تومانچه راوباسي او ځان په ډزو وژني.
هغه وېډیو چې پر ټویټر خپره شوې، خلک ښکاري چې په وېره کې منډې وهي. پولیس او څارګرې ادراې د ځان وژونکي کس نوم نه دی ښودلی.
د عکس سرچینه، TWITTER/@FLORIANLUHN/VIA REUTERS
د اېن بي سي خبریال جف بنت لیکي، د ډزو پرمهال هغوی د سپینې ماڼۍ د ورځني کنفراس خونو کې پټ شوی وو.
په وروستیو کلونو کې سپینې ماڼۍ ته څېرمه د ناامنیو ځينې پېښې ډېرې شوې.
د تېرې فبرورۍ میاشتې پر ۲۳مه هم یوې ۳۵ ښځې د سپینې ماڼۍ شاوخوا پر امنیتي موانعو خپل موټر وجنګاوه.
تېر کال، یوه کس هم د سپینې ماڼۍ شاوخوا ونو کې چکر واهه، چې بیا وروسته د سپینې ماڼۍ بڼ ته ننوتلی و.
