هند کې د جنګي الوتکې لومړنۍ ښځینه پیلوټه
د عکس سرچینه، Getty Images
د هند هوايي ځواک د ښځینه جنګي پیلوټانو روزنه پیل کړې.
د دغه ځواک په یوه اعلامیه کې ویل شوي، ۲۴ کلنه ایواني چترویودي د دغه هېواد لومړنۍ ښځینه پیلوټه ده، چې مګ ۲۱ ډوله الوتکه یې تر نیم ساعت پورې الوځولې.
له بي بي سي سره خبرو کې د هند هوايي ځواک ویاند ویلي، د یوې ښځې لخوا د جنګي الوتکې الوځول د هېواد پوځ په تاریخ کې ستره ورځ ده.
ایواني چترویودي د هغو لومړنیو ښځو په ډله کې ده، چې د هند هوايي ځواک کې د جنګي پیلوټې په توګه برخه اخلي.
د هند هوايي ځواک پر خواله رسنۍ ټویټر هم د ښځینه جنګي پیلوټې د لومړني الوت تصویرونه خپاره کړي دي. ایواني لومړی ځل د تېرې دوشنبې پر ورځ الوت کړی و، خو رسماً د پنجشنبې پر ورځ دې لړ کې اعلامیه خپره شوې ده.
ویل کېږي، د ایواني تر څنګ دوې نورې پیلوټانې باونا کانت او موهانا سینګ هم دا مهال روزل کېږي او ژر به جنګي الوتکې والوځوي.
د عکس سرچینه، Twitter
بل لور ته د هند ګاونډي هېواد پاکستان په هوايي ځواک کې دا مهال ۲۰ ښځینه جنګي پیلوټانې فعالیت کوي. پاکستان ۲۰۰۶ کال کې د ښځینه جنګي پیلوټانو روزنه پیل کړه.
