تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
'د ملي امنیت مشر له جنرال دوستم غوښتي چې کابل ته ستون شي'
وروسته له دې چې د اسلامي جمعیت، ملي اسلامي جنبش او د افغانستان د خلکو د اسلامي وحدت ګوندونو ټلواله جوړه کړه، د افغان ولسمشر د لومړي مرستیال جنرال عبدالرشید دوستم دفتر ویلي چې د ملي امنیت د ریاست مشر معصوم ستانکزي پرون، سه شنبه د چنګاښ ۱۳، د ترکیې انقره ښار کې له ښاغلي دوستم سره کتلي او خبرې اترې یې ترسره کړي. خو د ولسمشرۍ ماڼۍ وايي، ارګ له دې خبر نه دی.
د جنرال دوستم د دفتر مشر عنایت فرهمند د بي بي سي خبریال تاج الدین سروش ته ویلي چې ښاغلي ستانکزي له جنرال دوستم غوښتي چې کابل کې "د افغانستان د سیاسي مشرانو په نژدې وخت کې ترسره کېدونکې ناستې" کې دې ګدون وکړي، خو په دې اړه یې ډېر جزییات ورنه کړل.
تېره اونۍ د جنرال دوستم په مشرۍ د ملي اسلامي جنبش، د صلاح الدین رباني په مشرۍ او د عطامحمد نور په ګډون د اسلامي جمعیت او د محمد محقق په مشرۍ د افغانستان د خلکو د اسلامي وحدت ګوندونو د "د افغانستان د ژغورنې لپاره د ایتلاف عالي شورا" په نامه ټلواله جوړه کړه.
نوې جوړې شوې شورا له افغان ولسمشر غني غوښتي چې د دوی په ټکو له خپلو "ناقانونه اقداماتو" دې لاس واخلي.
د ولسمشر د لومړي مرستیال د واکونو بېرته ورګرځول، د ملي یووالي حکومت د هوکړې پر بنسټ د کابینې د وزیرانو او د اجرایيه ریاست مرستیالانو واکونه بېرته ورګرځول، په امنیتي ادارو کې بنسټیز سمونونه راوستل، د حکومت منځ کې د سیاسي غاړو ترمنځ د باور بیا راژوندي کول، د اداري سمون او د ټاکنو کمیسون د غړو په ټاکلو کې بیاکتنه او ځینې نورې هغه غوښتنې دي چې دې شورا مطرح کړې دي.
ولسمشرۍ ماڼۍ د ټلوالې د اعلانېدو په غبرګون کې وويل، په دې ایتلاف کې شامل کسان د حکومت غړي دي او د حکومت کمی او لاسته راوړنې همدوی ته متوجه دي.
د بلخ والي عطامحمد نور چې د اسلامی جمعیت ګوند اجراییه مشر هم دی، د بي بي سي خبریال ته ویلي چې ارګ هڅه کوي دغه ټلواله سره ووېشي.
د ولسمشر لومړی مرستیال ښاغلی دوستم وروسته له دې چې پر احمد ایشچي د ده له خوا د جنسي ځورونو د تور د دوسیو، سیاسي فشارونه او نیوکې ډېرې شوې ترکیې ته ولاړ.
د بلخ والي عطا محمد نور چې له ولسشمر محمد اشرف غني سره یې هوکړې کومې ښکاره پایلې نه درلودې، په دې ورستیو کې د پراخو مدني اعتراضونو ګواښ کړی و.
د اجرایه ریاست دویم مرستیال محمد محقق څه موده وړاندې د هزاره لږکیو له خوا د افغان دولت ضد مدني اعتراضونو کې د دولت په پلوۍ درېدلی و.
ټاکل شوې دا نوې جوړه شوې شورا په کابل کې د یوې غونډې په ترڅ کې رسماً خپل موجودیت اعلان کړي.
