"د افغان کډوالو په ستنېدلو سره پاکستان کې د غالیو صنعت له منځه ځي"

ایکسپرېس ټريبيون:

ایکسپرېس ټريبيون په پاکستان کې د افغان غاليو صنعت ته کتنه کړې او پوښتي، اوس چې کډوال له پاکستانه وځي نو ايا دغه هېواد د غالۍ اوبدنې صنعت سره مخ ښه کوي.

ورځپاڼه وايي، د کډوالو بېرته ستنول د غاليو اوبدلو پر صنعت سخت اغېز کړى او ور سره تړلي کاروبانه تړل کېږي.

ورځپاڼه زياتوي، ځايي سوداگر او افغان کاروباريان دواړه دا وېره لري چې د مسلکي کارکوونکو د نشتوالي له امله دا صنعت ښايي ړنگ شي.

د ورځپاڼې په وينا، پر افغانستان د شوروي اتحاد له بريد وروسته، په ٨٠ لسيزه کې، غالۍ اوبدونکي پاکستان ته ورغلل او په پېښور کې یې د افغان غالۍ اوبدنې صنعت دود کړ.

په پېښور کې ٧٠ سلنه غالۍ اوبدونکي افغانان دي او په پېښور کې د دوى توليد نړېوال نوم گټلى.

د غاليو يوه پاکستاني سوداگر ورځپاڼې ته ويلي د دغه صنعت له منځه تللو سره به د پاکستان ملي عوايدو ته زيان واوړي.

نيويارک ټايمز:

امريکايۍ نيويارک ټايمز ورځپاڼه وايي، د روسيې بهرنيو چارو وزارت د انټرفاکس خبري اژانس ته ويلي، که امريکا له افغانستانه د خپلو ځواکونو ايستلو پرېکړه وکړي نو دا به دغه هېواد کې روان حالت لا پسې ناوړه کړي.

انټرفاکس د افغانستان لپاره د ویلاديمير پوتين د ځانگړي استازي ضمير کابلوف له خولې ليکلي "تر هغه ځايه چې زه پوهېږم، ولسمشر ټرمپ له دغه هېواده د خپلو ځواکونو د ايستلو هوډ نه لري، ځکه که په روانو حالاتو کې دا پرېکړه کېږي نو هر څه به ونړېږي."

ډان:

پاکستانۍ ورځپاڼه ډان وايي، پاکستان تېره ورځ د ابابيل په نامه د يوه ډول باليستيک توغندي بريالۍ ازموينه وکړه.

ابابيل له ځمکې نه ځمکې ته توغندى دى چې ٢٢٠٠ کيلومټره واټن وهي او گڼې ګولۍ لېږدولى شي.

د ورځپاڼې په وينا، د ابابيل توغندى اټومي ګولۍ هم لېږدوي او په يو مهال په کره توکه د گڼو موخو په نښه کولو وړتيا لري.