تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
ټرمپ درې مهمو څوکیو ته نوماندان غوره کړل
د امریکا ټاکل شوي ولسمشر ډونلډ ټرمپ متقاعد جنرال مایکل فلین ته د ملي امنیت سلاکار څوکۍ وړاندیز کړی دی. د سي آی اې د ریاست لپاره یې له کانزاس ایالته د پارلمان غړی مایک پومپیو او جمهوریپال سناتور جف سشنز یې لوی څارنوالۍ مقام ته نومولي دي.
مایک پومپیو چې د امریکا د استخباراتو د مرکزي ادارې سي آي اې د ریاست لپاره نوماندي منلې، د جمهوریپال ګوند غړی دی.
ښاغلی پومپیو یو له هغو کسانو ؤ چې ایران سره د اټومي هوکړې مخالفت یې کاوه.
لوی څارنوالۍ ته نوماند سناتور سشنز د ټاکنو پر مهال د ډونلډ ټرمپ یو له کلکو متحدانو ؤ.
د نیویارک ټایمز ورځپاڼې په لیکنه ښاغلی سشنز ۱۹۸۶ کال کې د هغه مهال د ولسمشر رونالډ رېګن له خوا قضايي مقام ته ورپېژندل شوی ؤ، خو سنا مجلس کې یوې کمیټې د دې لپاره رد کړ چې تند توکمیز لیدلوری لري.
ښاغلی فلین چې په ټاکنیز کمپاین کې د ښاغلي ټرمپ سلاکار و، د اسلامي دولت (داعش) نومې ډلې په تړاو افراطي نظر لري.
هغه په دې وروستیو کې په یوه ټویټ کې له مسلمانانو وېره عقلاني وبلله.
مایکل فلین د دوو کلونو لپاره تر ۲۰۱۴ کال پورې د امریکا د دفاعي اطلاعاتو سازمان مشري کوله.
هغه مهال فلین د داعش پروړاندې د امریکا د ولسمشر بارک اوباما د سیاستونو له سختو منتقدینو و.
ښاغلي فلین همداراز ویلي؛ واشنګټن باید له مسکو سره نژدې همکاري ولري.
څو ورځې وړاندې ښاغلي ټرامپ رېنس پریبس د خپل دفتر د رییس په توګه وټاکه.
