تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د اروپایي کمیسیون مشر وايي 'د ټرمپ غوراوی د اروپا او امریکا پر اړیکو ناوړه اغېزه کولی شي'
د اروپایي کمیسیون مشر جېن کلود یونکر وایي د امریکا د ولسمشر په توګه د ډونلډ ټرمپ غوراوي کې، د دې خطر شته چې د اروپا او امریکا ترمنځ اړیکې خرابې شي.
ښاغلي یونکر لوګزمبورګ کې یو شمېر زده کوونکو ته وویل " موږ به اړ یو ټاکل شوي ولسمشر ته زدکړه ورکړو چې اروپا څه ده او څنګه کار کوي ".
تر دې وړاندې د اروپايي هېوادونو مشرانو د ښاغلي ټرمپ د غوراوي پر وړاندې له احتیاطه ډکې څرګندونې کړې وې.
د ټاکنیز کمپاین پر مهال ښاغلي ټرمپ د اروپايي ټولنې او ناټو په اړه سختې خبرې وکړې او له روسیې سره یې د ښو اړیکو د جوړولو لیوالتیا وښوده.
بله خوا د امریکا ځینو ښارونو کې د ښاغلي ټرمپ پر وړاندې مظاهرې وروسته له دوو شپو اوس هم روانې دي او په تاوتریخوالو اووښتي.
ځینو مظاهره کوونکو شخصي ملکیتونو ته هم تاوان اړولی دی، د موټرونو ښیښې یې ماتې کړي او پر پولیسو یې توکې ور ګوزار کړي.
پولیسو بیا له مرچ شیندونکو او ربړي مرمیو کار اخیستی دی او ۲۶ کسان یې نیولي دي.
نیویارک کې ښاغلی ټرمپ د هغې کاري ډلې په جوړولو بوخت دی چې د ۲۰۱۷ کال د جنورۍ پر ۲۰ یې، د اوسني ولسمشر بارک اوباما د ځای ناستي کېدو او سپینې ماڼۍ ته د ننوتو پر مهال بدرګه کړي.
