وېمبېلډن: راجر فیډرر او نډال خپلې لوبې وګټلې
د عکس سرچینه، Getty
په بریتانیا کې د ټنېس د وېمبېلډن روانو اتلولیو په دویمه ورځ راجر فیډرر او رفایل نډال خپلې لوبې وګټلې او د سیالیو دویم پړاو ته یې لار ومونده.
د سویس پخواني اتل راجر فیډرر په یوازې ۶۷ دقیقو او په دوو لړلوبو کې دمیر زومهور ته ماتې ورکړه.
نوموړي لوبه ۶-۱ ۶-۳ وګټله او د وېمبېلډن اتلولیو دویم پړاو ته ولاړ.
پر نوموړي سربېره د اسپانیا رفایل نډال هم په اسانۍ د لومړي لوبه وګټله.
۲۹ کلن نډال چې په وروستیو کې دومره ښه نه دی ځلېدلی خپل سیال توماس بېلوسي ته په دریو لړلوبو کې ماتې ورکړه.
په ښځینه لوبغاړو کې د بریتانیا لومړی نمبر لوبغاړې هېدر وټسن خپلې سیالې کارولاین ګارسیا ته په یوه اوږده او سخته سیالي کې ماته ورکړه.
۲۳ کلنه هېدر وټسن د بریتانیا له هغو لوبغاړو ګڼل کېږي چې تمه ده په دغو سیالیو کې ډېره مخته ولاړه شي.
د نارینو په سیالیو کې د بریتانیا انډي مري هم وتوانېد خپله لومړۍ لوبه وګټي.
نوموړي د قزاقېستان میخایل کوکوشکين ته په دریو لړلوبو کې ماته ورکړه.
