د فوټبال نړیوال جام: سویس اېکواډور مات کړ
د فوټبال د ۲۰م نړیوال جام په څلورمه ورځ د اي ګروپ په لومړۍ لوبه کې د سویس لوبډلې اېکواډور ته ۲-۱ ماته ورکړه.
د سویټرزرلینډ هیرېس سېفروویچ د لوبې په وروستیو دقیقو کې د روډریګز په توپ ګول وواهه او خپله لوبډله یې بریالۍ کړه.
تر دې وړاندې د لوبې لومړی ګول په ۲۲مه دقیقه کې د اېکواډور لوبغاړي انیر ویلنسیا وکړ او خپله لوبډله یې مخته کړه.
د لومړۍ نیمايي تر پایه د اېکواډور لوبډله یو ګول مخته وه.
د لوبې د دویمې نیمایي له پیل درې دقیقې وروسته د سویټرزلینډ ایډمیر محمدي ګول وکړ او لوبه یې برابره کړه.
په ټوله لوبه کې د سویس لوبډله برلاسه ښکارېده، د توپ کنټرول هم ۶۲ سلنه د سویس لوبغاړو سره و او دوی د اېکواډور په ګول ۱۷ بریدونه وکړل.
نن د اي ګروپ په دویمه لوبه کې فرانس او اندوراس سره مخامخ دي.
د نن ورځې په درېیمه لوبه کې بیا ارجنټاین له بوسنیا هرزګوینیا سره لوبه کوي.
