اېلون مسک د ټویټر نیلي مرغۍ لوګو پر X اړولی
د عکس سرچینه، Getty Images
د ټویټر خاوند اېلون مسک وايي، غواړي د دې خواله رسنۍ د مرغۍ لوګو پر اېکس (X) بدله کړي. ښاغلي مسک چې د نړۍ تر ټولو شتمن سړی دی، د خپل کاروبار نوم 'اېکس' ته اړولی دی.
هغه ویلي د ټویټر نوم او لوګو باید لا ډېر مخکې بدل شوي وای.
د رپوټونو له مخې دغه میلیاردر غواړي د (اېکس) په نوم یو 'سوپر اپ' جوړ کړي چې د چین 'ويچټ' ته به ورته وي.
نوموړي یکشنبه پر خپل ټویټر یوه پیغام کې لیکلي "موږ به ژر د ټویټر له برنډ او په کراکر کرار له ټولو مرغیو سره خدای پاماني وکړو."
د یادونې وړ ده چې ښاغلی مسک وخت ناوخت داسې څرګندونې هم کوي، چې جدي نه وي یا نه عملي کېږي.
هغه وروسته وویل چې د همدې ورځې پای کې به یوه لنډمهاله لوګو انلاین شي.
بلخوا د ټویټر اجراییه رییسي لېنډا یاکارینو هم لیکلي چې دغه شرکت لپاره تازه برنډ یو نوی په زړه پورې فرصت دی.
هغې زیاته کړې "ټویټر ستره اغېزه وښندله او زموږ د اړیکو لار یې بدله کړه. اوس به 'اېکس' لا پسې مخکې ځي او نړیواله څلورلارې به بدلوي."
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
'سوپر اپونه' له تېرو څو کلونو راهیسې اسیا کې د ځینو خلکو د ورځني ژوند مهمه برخه جوړوي.
د هند 'پی ټياېم' او د اندونیزیا 'ګو جېک' د دوی ښې بېلګې دي.
دغه کاریالونه خپلو کارنو یا کاروونکو ته اجازه ورکوي، چې د یوه مالي سیستم له لارې د خدماتو پیسې ورکړي.
ويچټ د خواله رسنۍ او پیغام استولو پلټفارم دی، چې د بېلابېلو خدماتو له کبله یې ګڼ شمېر کاروونکي او د سیمې په کچه سترو کاریالونو کې ځای موندلی دی.
تېر کال اټکل شوی و چې دغه پلټفارم یوازې په چین کې ۱ اعشاریه ۲۹ میلیارد کارن لري.
د مرغۍ لوګو
د عکس سرچینه، Getty Images
ټویټر کمپنۍ تر هغې وروسته چې د ۲۰۲۲ کال اکتوبر کې ښاغلي مسک پېرلې، خپل سوداګریز نوم (اېکس) کارپ ته اړولی.
خو د ټویټر ویبپاڼه وايي د اسماني مرغۍ لوګو د دې کمپنۍ تر ټولو ډېره پېژندل شوې پانګه ده او همدا لامل دی چې ډېره په پام یې ساتلې ده.
ټوېټر تېر اپرېل کې خپله لوګو د لنډمهال لپاره پر 'شیبا اینو' سپي بدله کړې وه.
د خواله رسنیو دغه پلټفارم تېره میاشت تر هغې وروسته له پراخو نیوکو او غبرګونونو سره مخ شو، چې ښاغلي مسک وویل، خپلو کارنو ته د پيغامونو لیدو د ورځنۍ کچې محدودیت ټاکي.
دا اعلان د دې لامل شو چې د فېسبوک مېټا کمپنۍ لخوا د ټویټر سیالۍ لپاره جوړ شوي کاریال 'ترېډز' ته د پیل په پنځو ورځو کې تر ۱۰۰ میلیونو ډېر کسان سر ورښکاره کړي.
