د باچاخان د لاس توکي چې پر شخصي ژوند یې رڼا اچوي
په پېښور کې د باچاخان اوونۍ کې د ترسره شویو مراسمو په ترڅ کې د باچا خان د استعمال توکي نندارې ته وړاندې شول چې ډېر کتونکي ترې د باچاخان ورځني ژوند په اړه جالب معلومات ترلاسه کولی شي.
په دغو توکو کې د هغه اغوستې جامې، ګومنځ، بوټان، چشمې یا عینکې، د ډاکتر نسخې او داسې نور شیان شته چې زموږ همکار اظهارالله یې عکسونه رالېږلي.
باچاخان به د چارسدې په اوتمانزو کې جوړې شوې د خمتا ساده جامې اغوستې چې په لاس به جوړېدې. دا کالي به کړییو کې رغېدل.
د باچاخان بېلچه چې کله نا کله به یې د زرغونوالي لپاره ځمکه پرې پستوله.
د عبدالولي خان پوهنتون استازی او څېړونکی ډاکټر سهیل وايي، باچاخان د معدې له ناروغۍ ځورېده او کله نا کله به ډېر ترې په تکلیف و.
ډاکتر سهیل وايي، کېدای شي ۱۹۷۹ کال به و چې باچاخان ته د مفصلونو ستونزه ور پیدا شوه چې ګرځېدل او په درېدلو کې ثبات یې زیانمن شو. د ده په وینا د باچاخان غاښونو هم دی کړاوه او تر څلورو غاښونه یې اېستلي ول.
باچاخان به له خالص کورم یا څرمنې جوړ شوي بوټان پښو کول.
ډاکټر سیهل وايي باچاخان تر ۱۹۵۰مو کلونو وروسته چشمې یا عینکې اچولې او د لوستلو لپاره به یې ورته ډېره اړتیا پېښېده.
د هند یوې پخوانۍ ورځپاڼې ټایمز آف ینډیا د ۱۹۸۷کال د جون پر ۲۷ مه، د باچاخان پر روغتیا او دا چې له ناروغۍ وروسته له روغتونه وتلی دی، پر خپلې لومړۍ پاڼې مطلب خپور کړی.
۱۹۷۲ کال کې د خان عبدالولي خان "پښتون زلمي " د وینا متن چې وروسته د کتابګوټي په ډول چاپ شو.
هغه ګاډی چې باچاخان به پکې لېرې پرتو سیمو ته د خلکو لیدو ته ورتله. ډاکټر سهیل وايي دا موټر به یې له ۱۹۸۱ کال وروسته استعمالاوه. تر هغه وړاندې د "ټوم ټوم " په نامه پېژندل شوي موټر کې یې سفر کاوه. دا موټر په اصل کې د هغه د زوی علي خان و،او وروسته له دې چې په ۱۹۸۸ کال کې باچاخان وفات شو، علي خان تر ۱۹۹۶ کال پورې چلاوه.
