دغه بريد يوه ورځ وروسته له هغه کېږي چې په دغې سيمه کې ٢٥٠٠ تازه ځواکونه ځاى پر ځاى شول

دغه بريد يوه ورځ وروسته له هغه کېږي چې په دغې سيمه کې ٢٥٠٠ تازه ځواکونه ځاى پر ځاى شول چې د اورپکو د زياتېدونکو خوځښتونو مخه ونيسي.

چارواکي وايي ١٥ نور سرتېري زخميان شوي هم دي چې روغتونونو ته د درملنې لپاره وړل شوي دي.

د پوليسو چارواکي وايي د پوځ يو گاډى چې له مهماتو ډک و په منگوره کې والوځول شو، چې د سوات مرکزي ښارگوټى دى.

د چاودنې د لامل په اړه ضد او نقيض خبرې کېږي، چې پوليس وايي دا يو ځانمرگى بريد و. پوليس همدارنگه وايي ځينو ولسي خلکو ته هم په چاودنه کې مرگ ژوبله اوښتي ده.

د سوات دره، چې د سيلانيانو لپاره يو په زړه پورې ځاى و، په ورستيو کې د يوې اورپکې ډلې په مرکز اوښتي چې مشر يې مولانا فضل الله دى.

له راپورونو سره سم، مولانا فضل الله په راديوگانو کې خلک د پاکستاني حکومت په ضد جهاد ته رابلل.

په سوات کې په جولاى مياشت کې هم په يوۀ بريد کې لس سرتېري وژل شوي ول. د پاکستان په قبايلي سيمو او سرحد ايالت کې د پوځ په ضد د اورپکو د بريدونو لړۍ وروسته له هغه پيل شوه چې تېر دوبى پوځيانو په اسلام اباد کې پر سرۀ جومات خونړۍ چاپه واچوله.