سرۀ صليب په جگړه کې ښکېلو غاړو باندې غږ کړى چې د طبي کارکوونکو درنوى وکړي

له کندهاره په خپره شوې يوه خبر پاڼه کې سور صليب وايي دغه ډاکټر خليل نوميږي چې له کندهار څخه د روان ميلادي کال د مارچ په مياشت کې تښتول شوى و .

سور صليب په خپلې خبر پاڼې کې يو وار بيا په جگړه کې ښکېلو ټولو غاړو ته ويلي چې د طبي کارکوونکو درناوى وکړي او په هر حالت کې يې د خوندي کولو هڅه وکړي .

خبر پاڼه زياتوي چې په جنگي حالاتو کې هم بايد د طبي کارکوونکو ژوند او کار ته خطر پېښ نه شي .

ډاکټر خليل د هغو پنځو طبي کارکوونکو په ډله کې له کندهاره د وسله والو طالبانو له خوا تښتول شوى و چې وروسته يې څلور کسان د وژل شوي طالب قومندان ملا دادالله د مړي په بدل کې خوشي شول .

د سرۀ صليب له نننۍ خبرپاڼې وړاندې د ډاکټر خليل د برخليک په برخه کې دقيق معلومات نه و .

طالبانو دوه ځله د تښتول شويو طبي کارکوونکو له ډلې څخه د يوۀ تن د وژلو ادعا کړې وه .

د څلورو تښتول شويو کسانو د خوشي کولو پر وخت ځينو افغان چارواکو لا هم ټينگار کاوۀ چې پنځم کس يې هم لا ژوندى دى او له وسله والو طالبانو سره دى .