صمد روحاني د افغانستان له سويل څخه

	په پنځو تښتول شويو کسانو کې دوه فرانسويان و چې يوه يې د ميرمن سيلون په نامۀ ياده شوې او اوس وسله والو طالبانو خوشې کړې ده

د دې خبرې تاييد په پاريس کې د فرانسې د بهرنيو چارو وزارت هم کړى دى .

قاري يوسف چې ځان د وسله والو طالبانو وياند بولي او د هغوى په استازيتوب له رسنيو سره تيلي فوني تماس نيسي بي بي سي ته ويلي چې دغه ميرمن يې چې سيلون نوميږي د کندهار ولايت د ميوند په ولسوالۍ کې قومي سپين ږيرو ته سپارلې ده .

قاري يوسف وايي دوى د دغې ميرمنې په لاس يو ليک هم ورکړى چې پکې د دۀ په وينا له فرانسې غوښتنه شوې ده چې د متحدو ايالاتو د گټو لپاره خپل سرتيري ونه کاروي .

وسله وال طالبان دا هم وايي چې په فرانسه کې د ولسمشرۍ د ټاکنو لپاره دوى د پاتې څلورو يرغملانو د برخليک پريکړه تر يوې بلې اوونۍ ځنډولې ده .

طالبانو پخوا د دغو يرغملو د خوشي کيدو لپاره غوښتنه کړې وه چې له افغانستان څخه دې د فرانسې سرتيري ووځي او له افغان حکومت سره پراتۀ طالب بنديان بايد خوشي شي .

دغه کسان د اپريل په دريمه نيټه هغه مهال وتښتول شول چې له نيمروز ولايت څخه د سړک په لار هرات ته خوځېدلي و .