ايمل پسرلى

	ولسمشر شيراک تيره شپه له ولسمشر کرزي په تيلي فوني خبرو کې وغوښتل چې د مرستندويانو په خوشي کولو کې مرسته وکړي

دا غوښتنه د فرانسې ولسمشر ژاک شيراک تيره شپه له خپل افغان سيال حامد کرزي سره په تيلې فوني خبرو کې وکړه .

پوره لس ورځې وړاندې دوه تنه فرانسوي مرستندويان له خپلو درو افغان همکارانو سره د نيمروز په ولايت کې د طالبانو له خوا تښتول شوي و. وسله والو طالبانو لا تر اوسه د دوى د برخليک په باب څه نه دي ويلي .

د فرانسوي مرستندويانو د خلاصون لپاره د ولسمشر شيراک تيلي فوني خبرې افغان چارواکو ته په داسې وخت کې نوى سرخوږى دى چې د ورځپاڼه ليکونکي اجمل نقشبندي په نه ژغورلو پرې نيوکې مخ په ډيريدو دي .

کابل کې د ولسمشرۍ له دفتره په خپارۀ شوي بيان کې راغلي چې ولسمشر کرزي خپل فرانسوي سيال ته د فرانسوي مرستندويانو د خلاصون په برخه کې د خپلو هڅو ډاډ ورکړى دى .

فرانسوي مرستندويان تر هغه لږ وروسته د وسله والو طالبانو له خوا وتښتول شول چې يو ايټاليايي ورځپاڼه ليکونکى د طالب زندانيانو د خوشي کولو په بدل کې پرېښودل شو .

هغه يوه بې سارې معامله وه چې جگ پوړي افغان چارواکي او ان بهرني ملاتړي يې پرې خوښ نه ول .

که کابل د پاريس فشار ته هم غاړه ږدي په دې خبر دى چې له خورا ډيرو نيوکو سره به مخامخ وي .

ولسمشر کرزي وروسته ومنل چې د ايټاليا له خوا پرله پسې غوښتنو دغه ډول يوې خبرې ته اړ ويستى و .

خو افغان مشر ټينگار وکړ چې له دې وروسته به داسې معامله هيڅکله ونه کړي .دا په داسې حال کې ده چې همدا اوس پنځه افغان طبي کارکوونکي او د فرانسوي مرستندويانو سره جوخت د هغوى درې افغان همکاران د طالبانو په ولکه کې دي .

د ښاغلي کرزي له خبرو دوه ورځې وروسته طالبانو د ايټاليايي ورځپاڼه ليکونکي افغان ژباړونکى اجمل نقشبندي وواژۀ .

ځينو دغه وژنه د وسله والو طالبانو هغه تاکتيک وبالۀ چې گواکې د فرانسې حکومت پرې ډاروي او هڅوي يې چې پر کابل فشار ډير کړي .

طالبانو د ايټاليايي ورځپاڼه ليکونکي تر خوشي کولو وړاندې د هغۀ افغان موټر چلونکى هم وژلى و چې د ځينو په وينا يې د روم فشارونه او هڅې گړندۍ کړې .

که کابل د پاريس فشار ته هم غاړه ږدي په دې خبر دى چې له خورا ډيرو نيوکو سره به مخامخ وي .

خو پوښتنه او ارزونه به يې دا وي چې په کور دننه فشارونه وزغمي که د نړيوالو ملاتړونکو غوښتنو ته شا کړي .

که انتخاب هر څه وي ښاغلى کرزى او اداره به يې د بلې غاړي په قناعت ډير وخت لگوي .