ارش پاکطين له کابله

	په تيرو نژدې دوو اوونيو کې د افغانستان په بيلا بيلو سيمو کې د ناټو ١٥ سرتيري وژل شوي دي

خبر پاڼه د وژنې ځاى نه وايي خو يادونه کوي چې دغه وژنې د دوو جلا چاودنو له امله شوې دي .

د دغو سرتيرو هويت هم نه دى څرگند شوى . ناټو په تيرو وختونو کې تر هغو د وژل شويو سرتيرو پېژندگلوي پټه ساتلې چې د هغوى د هيواد چارواکو پرې څه نه وي ويلي .

خو په هالنډ کې د دفاع وزارت ويلي چې په دغو وژل شويو سرتيرو کې يو تن د دوى د هيواد دى چې د افغانستان د هلمند په ولايت کې نن د پلې گزمې پر وخت پر يوۀ ماين د پښې اېښودو له امله ووژل شو .

دا په افغانستان کې لومړى ځل دى چې د هالنډ کوم سرتيرى په جگړه کې وژل کيږي . تير کال د دوى شپږ سرتيري د يوې چورلکې او يوې بلې الوتکې د لويدو له امله وژل شوي و خو په جگړه کې يې کله ځاني تاوان نه و ليدلى .

د افغانستان په سويل کې د ناټو د ځواکونو عمومي قومندان تورن جنرال ټان ون لون په خپل غبرگون کې ويلي دوى به د دغو سرتيرو ياد تل په دې ساتي چې د دۀ په وينا يې د افغانانو د ژوند ښه کولو لپاره قرباني ورکړه .

په تيرو نژدې دوو اوونيو کې شاوخوا ١٥ بهرني سرتيري په افغانستان کې وژل شوي دي . په وژل شويو کې تر ټولو ډير کاناډايي سرتيري و چې ډيره برخه يې د کندهار په ولايت کې ځاى پر ځاى دي .

د ٢٠٠٧ کال له پيل څخه راهيسته په افغانستان کې تر اوسه د نړيوالو ځواکونو ٤٢ سرتيري وژل شوي دي .

دغه وژنې ډيرې د سړک د غاړې په چاودنو او د ماينونو له امله شوي دي .

١١ ورځې وړاندې د يوې چاودنې له امله د کاناډا شپږ سرتيري په کندهار کې ووژل شول چې په يوه چاودنه کې د ناټو ځواکونو ته تر ټولو ډيره مرگ ژوبله وبلل شوه .