مالک عاصم له کابل څخه

په کابل کې د کاناډا سفيرډيوېډ سپرول خبريالانو ته وويل چې تر ٢٠٠٩ کاله به يې سرتېري دافغانستان په سويل کې امنيتي دندې ترسره کړي.

((دکاناډاحکومت له خپله اړخه ژمن دى چې ځواکونه به يې له افغانستان سره په امنيتي ډگر کې خپلو مرستو ته دوام ورکړي. زه تا سوته ډاډ درکوم چې دکاناډا حکومت او خلک به د ٢٠٠٩ کال تر جنورۍ پورې په دغه ماموريت کې له تاسو سره وي . تاسو ډاډه اوسئ چې کاناډايي ځواکونه به لږترلږه تر دغې ټاکل شوې نيټې پورې په کندهار کې خپلې دندې تر سره کړي.))

دکاناډا سفير په ډاگه کړه چې د مشرانو د جرگې دغه غوښتنه يو وړاندېز دى او هېواد به يې له افغانستان سره خپلې کړې ژمنې پوره کړي .

ددغه هېواد ٢٥٠٠سرتېري دافغانستان په نا ارامه ولايت کندهار کې امنيتي دندې ترسره کوي چې په تېر کال کې له گڼوبريدونوسره مخامخ شول .

کندهار د طالبانو کلک مرکز دى چې په تېر کال کې دافغان دولت مخالفينو ورته خپل ډير پام اړولى .

په تيرو څو کلونو کې تر ٤٠ زيات کاناډايي سرتيري په افغانستان کې وژل شوي دي. د سرتير تر څنگ کاناډا د افغانستان سره ستر مرسته کونکى هېواد دى چې سږکال غواړي ١٠٠ ميليونه ډالره دبيارغاونې په پروژو ولگوي .او تر ٢٠١١ کاله پورې هرکال سل سل ميليون ډالره له افغانستان سره مرسته وکړي .