کندهاريو له هغو ولايتونو څخه دى چې پکې داورپکو له خوا پر نړيوالو امنيتي ځواکونو باندې حملې نسبتا زياتې کيږي

په افغانستان کې د کاناډايي سر تيرو لپاره يوه وياند وويل ددغه عسکر چې د شا له خوا په سر باندې په تبر وهل شوى روغتيايي حالت ښه نه دى.

همدا راز دغه وياند وويل حمله کوونکى هم ځاى پر ځاى د يوه کاناډايي سر تېري له خوا په ډزو کې وژل شوى .

ټپي شوى کاناډايي عسکر په کندهار کې د نړيوالو ځواکونو يوه روغتون ته ليږدول شوى چې له هغه ځايه به جرمني ته د ناټو د سر تېرو لپاره روغتون ته ولېږدول شي

له بل پلوه يوه بل کاناډايي عسکر چې د علاج لپاره جرمني ته ليږدول شوى وو مړ شوى دغه کاناډايي عسکر د هغو پنځو سر تېرو په ډله کې وو چې تېره اونۍ د افغانستان په جنوب کې د يوه ځانمرگي بريد په مهال ټپي شوي وه.

د کاناډا حکو مت ويلي دي چې دغه راز بريدونه به په افغانستان کې د دوى پر ماموريت اغيزه ونه کړي .

په افغانستان کې د نړيوال ايتلاف په ليکو کې لږ ترلږه دوه زره کاناډايي سر تېري په دندو بوخت دي . دوى د افغانستان په جنوب کې د القاعده او طالبانو پر ضد د عملياتو تر څنگ د بيا رغونې کارونه هم کوي