د اوس لپاره د افغانستان په سويل لويديځو سيمو کې تر ډيره امريکايي سرتيري ځاى پر ځاى دي .

د کانادا د دفاع وزير ويليم گراهم افغانستان ته د خپل سفر په ترڅ کې نن ( د تلې ٢١ د اکتوبر ١٣ ) کندهار کې اعلان وکړ چې د نوي عيسوي کال له پيل څخه به د دوى ١٥٠٠ نور سرتيري د دغۀ هيواد سويل لويديځو سيمو ته ليږي .

کانادايي وزير يادونه وکړه چې دغه سرتيري به د امنيت تر څنگ د بيا رغاونې په چارو کې هم مرسته کوي .

د کندهار ولايت د بيا رغاونې د ډلې لپاره اوس هم د کانادا سرتيري په فعاليت بوخت دي .

ښاغلي گراهم هوډ وښوود چې د نويو سرتيرو په ورتگ به د امنيت او بيا رغاونې چارې د دغې سيمې ليري پرتو ساحو ته هم ورسيږي .

په کندهار کې د يوۀ خبري کانفرانس په ترڅ کې د کانادا د دفاع وزير دز خپلو سرتيرو له هغو دندو خوښي وښووله چې په افغانستان کې يې ترسره کوي .

کندهار ته تر راتگ وړاندې کانادايي وزير په کابل کې له ولسمشر حامد کرزي سره هم وليدل .