خپلواک ساپى له کابله

	تر خبري کانفرانس وړاندې د کانادا د بهرنيو چارو وزير لع ولسمشر کرزي سره وليدل

پيتر مککي له ولسمشر حامد کرزي او خپل سيال ډاکټر رنگين دادفر سپنتا سره تر خبرو وروسته په کابل کې يوه خبري کنفرانس ته دغه څرگندونې وکړې .

د دې خبري کنفرانس په مهال د افغانستان د باندينيو چارو وزيرهم په خپل وار له افغانستان سره د نړيوالې ټولنې او په دغه لړ کې د يوه نژدې متحد په توگه د کاناډا له لورې د اوږدې مودې د مرستو او ملاتړ پر اړتيا ټينگار وکړ .

د کاناډا د باندينيو چارو وزير پيتر مککي له ترهگرۍ سره په نومول شوې جگړه کې د راښکيلو لويديځو هيوادونو د لوړ پوړو چارواکو د تودو سفرونو په لړ کې وروستى چارواکى دى چې افغانستان ته سفر کوي .

په کابل کې له ولسمشر حامد کرزي او د باندينيو چارو له وزير ډاکټر رنگين دادفر سپنتا سره له خبرو وروسته ښاغلي مککي يو ځل بيا له افغانستان سره د مرستو د دوام په برخه کې هغه ژمنې تکرارکړې چې دوه مياشتې وړاندې د کاناډا لومړي وزير ستيفين هارپر همدلته په کابل کې کړې وې.

ده د ترهگرۍ له لورې گواښونو ته په کتو سره د افغانستان او کاناډا انديښنې او گټې شريکې وبللې او ټينگار يې دا وو چې هيواد يې په افغانستان کې د سولې او ثبات د راوستو لپاره په ليوالتيا سره د اوږدې مودې پانگونې ته چمتو دى .

دۀ وويل :
(( زموږ په وړاندې داسې لوى هدفونه دي چې په گډه يې بايد تر سره کړو . لکه د ديموکراسۍ پراختيا او د ترهگرۍ مقابله . کاناډا له څه شک پرته د يوه باثباته او د امن له اړخه د خوندي افغانستان له رادبره کيدو سره ډيره ليوالتېا لري . موږ په دې هم پوهيږو چې که د ترهگرۍ جرړې ونه وځي نو هيڅ هيواد به يې له گواښه خوندي نه وي . ځکه خو موږ له نړيوالې ټولنې سره اوږه په اوږه په افغانستان کې د ثبات د رامينځ ته کيدو لپاره هلې ځلې کوو . ))

د افغانستان د باندينيو چارو وزير ډاکتر سپنتا هم د کاناډا هيواد ، د افغانستان يو داسې متحد وباله چې د دۀ په وينا سرتيرو يې د افغانستان د خلکو د سوکالۍ لپاره وينې توې کړي دي . په ټوله کې ښاغلي سپنتا کاناډا له افغانستان سره د لويو مرسته کوونکو هيوادونو له ډلې څخه وبلله .

دۀ زياته کړه :
(( موږ د امنيت ، بيارغونې او ولسواکۍ په ډگر کې له افغانستان سره د کاناډا د پراخو مرستو او لويې ونډې ستاينه کوو . که د کاناډا او نړيوالې تولنې مرستې نه واى ، نو موږ په ټولو دغو ډگرونو کې دومره برياليتوبونه شول گټلى . ))

ښاغلى مککي کابل ته تر راتلو وړاندې د افغانستان په سويل کې د ميشتو کاناډايي سرتيرو د ليدو لپاره د سه شنبې په ورځ کندهار ته تللى وو .

اوس مهال د دغه ولايت د امنيت چارې کاناډايي ځواکونو ته ورتر غاړې دي . دغلته د ولايتي بيا رغونې يا PRT د ټيم په بڼه د ناټو په مشرۍ د نړيوالو مرستندويه امنيتي ځواکونو ايساف او د هغې تر څنگه د امريکې په مشرۍ د ايتلافي ځواکونو په چوکاټ کې ٢٢٠٠ کاناډايي سرتيري دنده تر سره کوي .