د طالبانو په واکمنۍ کې د بيا رغاونې يوازينۍ بېلگه د عيدگاه دغه جومات دى چې د هغوى له ليرې کيدو وروسته پرې نور کار وشو .

د کندهار د ښار شاوخوا ځينې زيارتونه د دغه ولايت د اوسيدونکو لپاره په ښو تفريحځايونو بدل شوي دي . زيارت کوونکي له دعاگانو وروسته په هغو پارکونو او ارام ځايونو کې له ژونده خوند اخلي چې د طالبانو له واکمنۍ وروسته جوړ شوي دي

دغه تفريحځايونه په دې لا ډير د پام وړ دي چې له ښاره وتلي او د غرونو په لمنو کې موقعيت لري . هلته د ښار د موټرو له گڼې گوڼې ليرې هوا ښه وي او په پرتليزه توگه پکې امنيت هم ښه وي

په تفريځايونو کې نژدې هره هغه اسانتيا شته چې د ورغليو ميلمنو پکار وي ، خو تر هر څه غوره او د پام وړ يې هغه ننداره ده چې په نورو ځايونو کې يې موندل گران دي

د طالبانو له واکمنۍ وروسته په کندهار کې سړکونو او لويو لارو ته ډير پام شوى دى . دغه سړک د کندهار ښار په څنډو کې د ارزگان ولايت ته غځيدلى دى

د کندهار اوسيدونکي وايي تر ټولو لږ پام ښوونې و روزنې ته شوى دى ، دا د کندهار پوهنتون دى چې لا تر اوسه يې د ودانۍ او شاوخوا سړکونو د جوړولو کار نه دى بشپړ شوى ، د کندهار پوهنتون د هيواد د نورو هغو په پرتله د محصلينو په وينا يې له پامه غورځول شوى دى

په دغه انځور کې د يوۀ ځاى دوه عکسونه وينئ يو پخوانى حالت او بل اوسنى ، د کندهار اوسيدونکي وايي که امنيت ښه شي ړنگې مېنې به ټولې ورغوي خو چې رغول شويو ته لا هم د ځينو زړۀ ډک وي ولې پرې کار وکړي

دې ته ورته مېلمستون د افغانستان په لږو نورو سيمو کې ليدل شوى ، خو دا يوازې ميلمستونونه نه دي د عينو مينې په نامۀ سيمه يې د ځايي خلکو په وينا داسې استوگنځايونه لري چې پخوا يې سارى نه و ليدل شوى

د کندهار اوسيدونکي کار غواړي ، دغې فابريکې ته ورته ځينې نورې هم په کندهار کې جوړي شوي خو څښتنان يې شکايت لري چې ماليه پرې ډيره ده او له بهرنيو هيوادونو راغلي توکي د دوى صنعت تر غوړيدو وړاندې پر ځاى دروي

د کندهار مازديگرى خپل خوند لري ، کله چې لمر تر غرونو اوړي د شفق رڼا يې ځينو ته هغه اورونه او بمونه وريادوي چې په دې وروستيو کلونو کې ډير ليدل شوي