طاهر خان له اسلام اباد څخه

	پاکستاني پوځ وايي د دوى چورلکو پر داسې ځاى بريد وکړ چې گواکې اورپکې پکې په روزنه بوخت و

د پوځ وياند تورن جنرال شوکت سلطان وويل چې ګن شپ ( توپ لرونکو ) چورلکو د وزيرستان په زمزوله سيمه کې د اورپکو په مرکزونو نن سهار ( د جنوري ١٦ د مرغومي ٢٦ ) هغه وخت بريد وکړ چې د دۀ په وينا اورپکې په روزنه بوخت وو.

د تورن جنرال شوکت سلطان په وينا د بريد په وخت په سيمه کې د ٢٥ او ٣٠ ترمينځه اورپکې موجود وو.لا تر اوسه آزادو سرچينو د پوځ د ادعاو تاييد نه دى کړى .

زمزوله نومي کلى د جنوبي وزيرستان د مرکز واڼې نه ٤٥ کلوميتره ليرې د جنوبي او شمالي وزيرستان ترمينځه پروت دى.

د ځايي خلکو له خولې ويل شوي چې سهار ٥ بجې يې سيمه کې د چورلکو آوازونه تر غوږ شو .

د پوځ وياند وويل چې تر څه وخت يې بمبار شوې سيمه څارله او عمليات د اورپکو د فعاليتونو په اړه د قوي معلوماتو له ترلاسه کولو وروسته پيل شو.

د ٢٠٠٤ کال جولاى په مياشت کې د پاکستاني پوځ او اورپکو ترمينځه د يوۀ تړون راهيسې جنوبى وزيرستان کې وضعه تر څه حده آرامه وه .

د پوځ وياند وايي سهار پنځه منټه کم اووۀ بجې په ترسره شويو عملياتو کې پاکستاني پوځ ته هيڅ زيان نه دى رسيدلې .

د تورن جنرال شوکت سلطان په وينا د بريد په وخت په سيمه کې د ٢٥ او ٣٠ ترمينځه اورپکې موجود وو

شمالي وزيرستان کې هم د تير کال سپټمبر د مياشتې د امن موافقې يا تړون راهيسې امنيت ټينګ دى.

پاکستاني پوځ وايي چې ٢٠٠١ کال کې د طالبانو په ضد افغانستان کې له بريدونو وروسته د القاعدې ګڼ شمير غړيو د پاکستان په قبايلي سيمو کې پناه اخېستې وه.

پاکستاني پوځ په تيرو ٥ کالو کې د القاعدې ، طالبانو او د هغوى د محلي يا ځايي پلويانو په ضد عمليات کړي دي او گڼ شمير کسان يې وژلي دي .

دغه وروستى بريد په داسې وخت کې شوى چې د امريکا د استخباراتو د څانگې مشر تيره اوونۍ وويل چې پاکستان د القاعدې په پناه ځاى بدل شوى دى . دا هغه تور و چې اسلام اباد په کلکه رد کړ .