د دغو وتليو فلمي ستوريو د نژدې اړيکو په باب له ډيره وخته گنگوسې وې

ابيشيک دهندي فلمي صنعت د تر ټولو مشهور لوبغاړي اميتابچن زوى دى .

د ميرمن راى سيکرتر هري سينگ بي بي سي ته وويل چې د دغو دوو ستورو د کوژدې مراسم په ممبۍ ( پخوانۍ بمبۍ ) کې د اېشورايا په کور کې ترسره شول .

له دغه اعلان سره هغه پرله پسې گنگوسې ختمې شوې چې ويل يې دغه دوه ستوري څرنگه دومره سره نژدې دي .

د دوى دوو د نژدې کيدو په باب هغه وخت گنگوسې په ډيريدو شوې چې دوه مياشتې وړاندې په گډه د هندوانو يوۀ معبد ته د تلو پر وخت وليدل شول .

له بي بي سي سره په خبرو کې هيري سينگ وويل د کوژدې پر وخت د دواړو ستوريو کورنۍ او دوستان په مېلمنو کې ناست وو .

دغه وروستۍ خبره په داسې وخت کې شوې چې د هلک او نجلۍ دواړو کورنۍ د کوژدې له مراسمو وروسته لا هم پټه خولۀ دي او په دې اړه هيڅ نه وايي .

هندي تلويزيونونو د ښاغلي بچن د کور دباندې گڼ شمير خلک ښکاره کړي چې د فلمي ستوريو د ليدو په تمه ولاړ و .

ميرمن راى د هندي فلمي صنعت يوه له وتليو ستوريو څخه گڼل کيږي چې په گڼ شمير وتليو فلمونو کې يې د ستورې څيره لوبولې ده .

	دغو دواړو ستورو په گڼو فلمونو کې گډ کار کړى دى

ابيشيک بچن هم په تيرو څو کلونو کې په گڼو فلمونو کې د ستوري رول لوبولى او يوې برتانوي ورځپاڼې له جنسي پلوه د تير کال لپاره د اسيا تر ټولو زړۀ راکښونکى هلک نومولى دى .

دوى دواړو په گڼو فلمونو کې يو ځاى کار کړى دى . خو په تيرو کلونو کې داسې گنگوسې وې چې ښايي ميرمن راى له نورو فلمي ستورو لکه سلمان خان سره ښايي وادۀ وکړي .

ابيشيک بچن پخوا له يوې بلې فلمي ستورې کرئسما کپور سره کوژده کړې وه خو د کوژدې شپې ورځې يې تلپاتې نه وې او تر وادۀ وړاندې سره جلا شول .