ارش پاکطين له کابله

	څو ورځې وړاندې د افغانستان د اطلاعاتو کلتور وزارت په دغه هيواد کې د کابل ايکسپريس فلم پر خپريدا بنديز ولگاوۀ .

د کابل ايکسپريس په نامۀ يادېدونکى دغه فلم په دې وروستيو کې هندي فلم جوړونکو خپور کړى دى .

په کابل کې د جمعې تر لمانځۀ وروسته په يوۀ جومات کې د غونډې پر وخت هزاره توکمو سياسي مشرانو دغه فلم وغاندۀ او غوښتنه يې وکړه چې بايد جوړونکي او کارکوونکي يې محاکمه شي .

په دغې غونډې کې چې د جمعې له لمانځه وروسته د کابل د يوې شعيه مېشتې سيمې په يوۀ جومات کې جوړه شوې وه په سلگونو کسانو برخه لرله. مرستيال ولسمشر کريم خليلي غونډې ته د خبرو پر مهال د کابل ايکسپرس فلم نه يوازې هزاره توکم ته بلکې د افغانستان ټولو اوسيدونکو ته سپکاوى وگاڼۀ او د هند له حکومته يې وغوښتل چې د دغه جوړشوي فلم د څرنگوالي په اړه دې څيړنې وکړي.

ښاغلي خليلي ادعا وکړه د افغانستان دښمنان غواړي چې د دا ډول فلمونو په جوړولو د يوم قوم احساسات را وپاوروي او افغانستان يو ځل بيا د ستونزو گړنگ ته وغورځوي.

ښاغلي خليلي د کوم ځانگړي کس يا ډلې نوم وا نه خيست خو دايې په ډاگه کړه چې د دۀ په وينا په دې پروگرام کې د هغوکسانو لاس دى چې د ترهگرۍ تر شا ولاړ دي. ښاغلي خليلي د کابل ايکسپريس ډايلوگ له سپکاوۍ ډک وبالۀ .

د غونډې په پاى کې يو پريکړه ليک هم صادر شو چې پکې دافعانستان له سترې محکمې، لويې څارنوالۍ او ځينو نورو ادارو غوښتل شوي و چې د جوړونکو او کارکوونکو تر څنگ دې په ځانگړي توگه د فلم لۀ يوۀ تن افغان لوبغاړي حنيف همگام څخه پوښتنې گروېږنې وشي چې د دوى په وينا يې د فلم اصلي ډيالوگ ويلى دى.

څو ورځې وړاندې د افغانستان د اطلاعاتو کلتور وزارت په دغه هيواد کې د کابل ايکسپريس فلم پر خپريدا بنديز ولگاوۀ .

د افغانستان په باب د طالبانو له نسکوريدو راهيسته گڼ شمير فلمونه جوړ شوي دي چې بيلا بيلو ډلو ځانته سپکاوى بللى دى خو دا لومړى ځل دى چې په لويه کچه د يوۀ فلم غندنه کيږي او په افغانستان کې پرې بنديز لگيږي .