اسمعيل مياخيل لندن

په دغه فلم کې د يوولسم سپتمبر وروسته د افغانستان ځينې پېښې انځور شوې دې. "کابل اېکسپرېس" د کبيرخان فلم دي چې د افغانستان په اړه يي ډېر ډاکومېنټري (مستند) فلمونه جوړ کړي دي.

کبير خان چې يو هندى ډاريکټر او په خټه پښتون دى وايي "هميشه مي هيله لرله چې د افغانستان په اړه يو هنري فلم جوړ کړم او پدې وياړ م چې دغه فلم د ټورنټو ښار په سنيما کې وښودل شو.

جان ابراهام او وارثي چې د هند د باليووډ ستوري دي په دې فلم کې عمده رول لوبوى چې ورسره يو افغان د ډريور په توگه او يوه امريکايي ستورې هم مله ده.

په دې فلم کې جان ابراهام او وارثي هندي خبريالان دي چې د يوې امريکايي خبريالې او يوه پاکستاني طالب سره د افغانستان هغو سيمو ته ورځي چې طالبان په کې واکمنى کوى.

کابل اېکسپرېس  جان ابراهام پدې فلم کې د يوه خبريال په توگه کار کړى دى

کبيرخان چې ددغه فلم کېسه ليکونکى هم دي وايي " په افغانستان کې فلم جوړول اسانه کار نه دى او دي ادعا کوى چې د طالبانو لخوا ورته گواښونه هم کېدل."

ښاغلي خان د يوې پوښتنې په ځواب کې ويلي چې هغه څنگه پروډيوسران (فلم جوړونکي)دې ته کانې کړل چې په افغانستان کې فلم جوړ کړى.

"اديتيا چوپړا چې ددي فلم پروډيوسر دي هغه خبر وو چې زه د افغانستان په اړه څومره تجربه لرم او د فلم کېسه يې هم ډيره خوښه شوه خو اديتيا د هغى وروسته راغى چې ما د جان ابراهام او ارشد سره قرارداد کړى وو. که دى په لومړى سرکې راغلى وى نو کېداشي ما د خپلى خوښې سړى ټاکلى وى"

افغانستان په سيمه کې د فلمونو ستر بازار وۀ په ځانگړې توگه د هندي فلمونو خو د تيرو څو کالونو جگړې او د طالبانو لخوا په فلمونو او سينماگانو باندې بنديز دغه بازار ډير سوړ کړ او اوس د طالبانو له نسکوريدو راهيسى يو ځل بيا د هندي فلمونو بازار په دي هيواد کې ډير تود شوى دى.

پدې تيرو لسيزو کې دري هندي فلمونه په افغانستان کې جوړ شوي دي "خداگواه"، "طالبانو څخه تېښته" او "جانشين". ددي لړۍ نوى فلم "کابل اېکسپرېس" دى چې هيله کيږى د لرو بر افغانانو د خوښې وړ به وگرځي.