صحرا دښته په یوه پېړۍ کې لس سلنه پراخه شوې
صحرا د نړۍ تر ټولو ستره دښته ده. خو اوس نوره هم په خورېدو ده. دا دښته په یوه پېړۍ کې لس سلنه پراخه شوې.
یوې نوې څېړنې موندلې چې صحرا د سویل په لور په خورېدو ده او سودان او چاد هېوادونو ته پراخېږي.
د عکس سرچینه، Getty Images
دې دښتې نه یوازې زرغونې سیمې په شاړو دښتو بدلې کړي، بلکې اوس یې د کرکېلې سیمې هم له ګواښ سره مخ کړې دي.
د صحرا بشپړ پراخوالی ۹۲ کیلومتر مربع دی، خو په تېره یوه پېړۍ کې په دې کې د پاکستان هېواد په کچه زیاتوالی راغلی.
د چاپېریال مجلې د څېړنې له مخې ساینسپوهان په دې نظر دي چې دا د چاپېریال د بدلون له امله شوي.
د عکس سرچینه، Getty Images
په یوه نوې څېړنه کې ساینسپوهانو له ۱۹۲۰ څخه راوروسته په افریقا کې کېدونکی کلنی باران ثبت کړی او دا یې څرګنده کړې چې د انسان په لاس په چاپېریال کې بدلون دغه سیمه له دې حالت سره مخ کړې.
دا ساینسپوهان باور لري چې دغه چاره به راتلونکي کې هم دوام وکړي.
د دغې څېړنې یوه پروفیسور ویلي چې څېړنې یوازې تر صحرا دښتې پورې محدودې نه دي بلکې ټوله نړۍ پکې راځي.
د عکس سرچینه، Getty Images
په نړۍ کې د وګړو د شمېر زیاتېدو سره د دښتو په شاوخوا کې د اوسېدونکو شمېر هم زیات شوی چې دا پخپله د دښتو د زیاتېدو لامل ګرځي.
یوه بله څېړنه بیا ښيي چې په افریقا کې د ګرمۍ موسم لا نور په ګرمېدو دی، خو د ژمي موسم بیا ورو ورو لنډ او مخ پر تودوخه دی، دا بدلون پخپله د وېرې حالت زېږوي.
