ترکیې ته د ملا عبدالغني برادر سفر: هلته مېشت افغان او ترکي پانګه وال یي افغانستان کې پانګونې ته وربللي

ترکیې ته د طالبانو د حکومت لوړ پوړي چارواکي ملا عبدالغني برادر د سفر په څلورمه (جمعې) ورځ د ترکیې د بهرنۍ سوداګرۍ د دفتر له مشر او نورو مشهورو پانګه والو سره کتلي دي.

د طالبانو د حکومت د اقتصادي مرستیال له دفتر څخه په خپره شوې خبرپاڼه کې راغلي " ملا عبدالغني برادر اخوند د یادې لیدنې پر مهال افغان او ترکي پانګوالو ته ډاډ ورکړ چې په افغانستان کې د سرتاسري امنیت په ټینګېدو سره اوس د پانګونې لپاره ښه زمینه برابره شوې."

په خپرپاڼه کې راغلي دا کتنه چې د ترکیې بهرنۍ سوداګرۍ دفتر په مرکزي ودانۍ کې ترسره شوه پکې ملا برادر افغان او ترکي پانګه وال وهڅول چې حکومت یې د کانونو، کرنې، برېښنا تولید، زېربناوو، صنعت، مخابراتو، سوداګرۍ او نورو بېلا بېلو برخو کې پانګونې ته آسانتیاوې برابرې کړې او د پانګوالو بشپړ ملاتړ کوي.

په افغانستان کې ځينې ترکي شرکتونه وار له مخه ښه پانګونه لري او دغه هېواد کې ترکي توکي هم ښه نوم لري.

د طالبانو د ریاست الوزرا اقتصادي مرستیال دفتر په خبرپاڼه کې ویلي " د ګډون‌کوونکو کمپنیو استازو چې ډېری یې په افغانستان کې د پانګونې مخینه او تجربه لري، په افغانستان کې پانګونې ته بشپړه لېوالتیا وښوده او څرګنده یې کړه چې له شته فرصتونو به د دواړو هېوادونو په ګټه استفاده کوي."

د ملا عبدالغني برادر په مشرۍ د طالبانو دا لوړ پوړی پلاوی د سې شنبې پر ورځ ترکیې ته په سفر تللی او له پانګه والو سره له لیدنې مخکې یې د ترکیې د بهرنیو چارو له وزیر سره هم کتلي دي.

د ملا برادر او د ترکیې د بهرنیو چارو وزیر غونډه

د طالبانو د حکومت د ریاست الوزرا مرستیال ترکيې ته تللی. عبدالغني برادر چې د ملګرو ملتونو د سفر بندیزونو په نوملړ کې يې هم نوم شته د ترکيې له بهرنیو چارو وزیر حقان فیدان سره يې هم کتلي.

د هغه دفتر ویلي چې په یاده کتنه کې د اقتصادي همکاریو په پراخېدو، سوداګرۍ او د کډوالو د موضوعاتو په ګډون په دوه اړخیزو موضوعاتو خبرې شوې.

د ترکيې د بهرنیو چارو وزارت پر خپله رسمي ټويټرپاڼه د طالبانو د حکومت د ریاست الوزرا د مرستیال ملا عبدالغني برادر او د ترکیې د بهرنیو چارو د وزیر حقان فېدان د لیدنې تصویرونه خپاره کړي او لیکلي يې دي چې دوی په انقره کې سره کتلي.

د طالبانو د حکومت د ریاست الوزرا اقتصادي معاونیت هم په یوه خبرپاڼه کې کښلي چې دوی په دې کتنه کې "د دوه اړخیزو مناسباتو، سوداګرۍ، سیمه‌ییز اتصال او دواړو هېوادونو ترمنځ د اقتصادي همکاریو د پراختیا په" اړه خبرې کړې.

په دې اعلامیه کې راغلي چې دوی "د دواړو هېوادونو ترمنځ د سوداګرۍ ګډې خونې پر جوړېدو، د دواړو هېوادونو ترمنځ د هوایي دهلېز پر پرانیستلو، د ترکي پانګوالو له لوري په افغانستان کې د پانګونې پر زیاتوالي او افغانانو ته د وېزو په ورکړه کې د آسانتیاوو په برابرولو" هم غږېدلي.

د ملا برادر دفتر زیاته کړې چې هغه په دې کتنه کې له ترکیې غوښتي چې "په دې هېواد کې له مېشتو افغان مهاجرینو سره ښه سلوک وکړي".

ملا عبدالغني برادر چې د طالبانو د تحریک له بنسټګرانو دی د دغې ډلې دویم مشر او د حکومت د ریاست الوزرا اقتصادي مرستیال هم دی او د سفر د بندیزونو په نوملړ کې یې د نوم له شتون سره سره په تېر یوه کال کې تر ټولو لوړپوړی طالب چارواکی دی چې بهر سفر کوي.

ترکیه چې د ناټو سازمان غړی هېواد هم دی لا یې د نورې نړۍ په څېر د طالبانو حکومت په رسمیت نه دی پېژندلی خو د ایران او د سیمې د یو شمېر نورو هېوادونو په څېر يې د افغانستان سفارت طالب استازو ته سپارلی.

که څه هم د ترکيې د بهرنیو چارو د وزیر او د ملا برادر په لیدنه کې د پخواني حکومت لخوا ګومارل شوی سفیر هم په هغو تصویرونو کې لیدل کېږي چې د ترکیې د بهرنیو چارو وزارت پر خپله ټویټر پاڼه خپاره کړي.

ترکيه دغه راز د ګڼو هغو افغان څېرو کوربه توب هم کوي چې په افغانستان کې د طالبانو د حکومت مخالف دي او ځینو خو یې له طالبانو سره د وسله والې جګړې او مخالفت اعلان هم کړی.