قطر کې د طالبانو سیاسي دفتر مشر؛ رسمیت پېژندنه د "ځينو کورنيو مسایلو" حل غواړي

قطر کې د طالبانو د سیاسي دفتر مشر سهیل شاهین منلي چې ځينو کورنیو مسایلو له نړۍ سره د طالبانو د حکومت مخه ډب کړي.

ښاغلی شاهین چې د طالبانو لخوا په ملګرو ملتونو کې د افغانستان دایمي استازولۍ ته هم نومول شوی، وايي "ځينې مسایل په داخل کې دي او هغه مونږ نه حل غواړي مونږ باید په هغو غور وکړو."

نوموړي د طالبانو واک لاندې ملي تلویزیون سره ځانګړي مرکه کې په دې اړه چې دا کوم مسایل دي، ځانګړي څه ونه ویل خو دا مهال بشري موضوعات، د نجونو زدکړې او د ښځو حقونه د ډېرو نړیوالو په خوله دي.

هغه د ځينو ستونزو منلو تر څنګ تمه وښوده چې "د وخت په تېریدو سره دا مسایل حل شي."

سهیل شاهین وايي، د طالبانو له حکومت او له دوی سره د ډېرو هېوادونو د استازو په ناستو او راشه درشه کې توپیر راغلی خو په وینا یې د ځينو مسایلو له حل کولو سره دا وضعیت لا ښه کیدای شي.

له حل کولو سره دا وضعیت لا ښه کیدای شي.

ښاغلي شاهین ادعا وکړه چې "نړۍ په ملګرو ملتونو کې د افغانستان دایمي استازولي د فشار په ډول کاروي" او په وینا یې اوسنۍ وضعیت اغېزناک نه دی.

په ملګرو ملتونو کې د افغانستان استازولي لا هم د جمهوریت د وخت استازی نصیر احمد فایق کوي او ډېر وخت یې په افغانستان کې بشري وضعیت او د ښځو پر وړاندې د طالبانو سختې تګلارې ننګولي دي.

طالبانو بیا بیا ویلي چې ښاغلی فایق "د ولس او د دوی د حکومت استازولي نشي کولی."

سهیل شاهین یو له هغو طالب چارواکو دی چې له بهرنیو استازو او افغانستان لپاره د ګڼو هېوادونو له سفیرانو سره چې په قطر کې مېشت دي، ډېرې ناستې لري.

دی چې اوس بېرته افغانستان ته تللی ډېر اټکل کېږي چې ښايي د دغو استازو غوښتنې او نظرونه کابل او کندهار کې طالب مشرانو ته ورسوي.

د رسمیت شرايط څه دي؟

نړیوالې ټولنې د طالبانو حکومت رسمیت پېژندنې لپاره ځینې شرایط وړاندې کړي دي. د ټولګډونکي حکومت جوړېدل، بشري حقونو ته درناوی او د نجونو زدکړې هغه څه دي چې د شرطونونو په ډول وړاندې شوي دي.

د دې تر څنګ نړیوالې ټولې ویلي "د طالبانو سره تعامل د دوی په کړو وړو پورې اړه لري."

طالب چارواکي بیا وايي، حکومت کې یې د ټولو قومونو خلک شته او ادعا کوي چې د "شریعت" په چوکاټ کې یې ښځو ته حقونه ورکړي دي. د طالبانو په حکومت هېڅ لوړ پوړې ښځه پر دنده نه ده ګومارل شوې او د ښځو چارو وزارت یې هم په امر بالمعروف اړولی دی.

اوس څه باندې دوه کاله کېږي چې د طالبانو حکومت هېڅ هېواد په رسمیت نه دی پېژندلي. افغانستان په ګڼو نړیوالو بنسټونو کې استازولي نه لري او یا یې د جمهوریت د مهال استازي مشري کوي. هاغسې چې سهیل شاهين ویلي، تر هغې چې د بشري حقونو، د حکومت بڼې او د نجونو زدکړو په اړه د طالبانو د حکومت دریځ بدل شوی نه وي، ښايي نړیواله ټولنه یې رسمیت پېژندنې ته زړه ښه نه کړي.