د بورکینا فاسو یوه جومات کې د لمانځه پرمهال لسګونه کسان وژل شوي

په بورکینا فاسو کې چارواکي وايي، په هماغه ورځ چې پر یوې کلیسا برید شوی و، لسګونه کسان په یوه جومات کې په ډزو وژل شوي دي.

د سهار د لمانځه پر مهال وسله والو د ناتیاباني په ښارګوټي کې جومات محاصره کړ.

یوه ځايي اوسېدونکي د فرانسې خبري آژانس ته ویلي دي: "قربانیان ټول مسلمانان وو، چې ډېری یې نارینه وو."

د بورکینا فاسو له درېیمې برخې زیاته برخه اوس مهال د اسلامپالو اورپکو په ولکه کې ده.

ګومان کېږي چې بریدګر اسلامپالي جنګیالي وو چې په هماغه ورځ یې په سیمه کې ځای پر ځای شوي عسکر او د ځان د دفاع یوه ملېشه هم په نښه کړه.

په ټولنیزو رسنیو کې ناتایید شوي راپورونه ښيي چې د جومات برید کې د مړو شمېر ممکن د چارواکو لخوا تر ورکړل شوي شمېر ډېر وي.

ناتیاباني- هلته چې دا بریدونه شوي، د بورکینا فاسو په ناکراره ختیځه سیمه کې دی چېرې چې ډېری وسله‌والې ډلې فعالې دي.

په همدې ورځ د هېواد په شمال ختیځ کې د ایساکان په ښار کې د یکشنبې په ورځ د یوې کاتولیکې کلیسا په برید کې لږ تر لږه ۱۵ تنه عبادت کوونکي ووژل شول. د کلیسا یوه چارواکي ویلي، چې د دې پېښې پړه پر اسلامپالو وسله والو اچول شوې ده.

په رسمي ډول د دواړو بریدونو ترمنځ کوم تړاو نه دی څرګند شوی، خو د بورکینا فاسو خصوصي ملکیت لرونکې L'Observateur Paalga ورځپاڼې پوښتنه کړې چې ایا دا د یوې همغږې دسیسې برخه وه.

په بورکینا فاسو کې په مذهبي شخصیتونو بریدونه غیر معمولي نه دي.

یو پادري چې پنځه کاله مخکې د جیبو له شمالي ښارګوټي څخه تښتول شوی و لا هم ورک دی. او په ۲۰۲۱ کې ، د جیبو ښار اصلي امام د وسله والو لخوا وتښتول شو او څو ورځې وروسته مړ وموندل شو.

بشردوستانه کارکوونکي وايي بورکینا فاسو د نړۍ یو له هغو سیمو ده چې کړکېچونه یې له پامه غورځول شوي دي.

د کلونو پراخې ناامنۍ له دوه میلیونو څخه ډېر خلک له خپلو کورونو وتلو ته اړ کړي دي او ملګري ملتونه اټکل کوي چې د ټولو ماشومانو څلورمه برخه د لوږې له امله له ودې کولو درول شوي دي.

پوځ چې دوه کاله وړاندې یې واک ترلاسه کړ، د یاغیانو پر وړاندې یې د جګړې د ګټلو ژمنه وکړه، خو لا هم تاوتریخوالی دوام لري.