د پاکستان او هند ساحلي سیمو کې د سخت توپان وېره؛ لسګونه زره کسان خوندي سیمو ته لېږدول شوي

د پاکستان او هند د هوا پېژندنې ادارو د اعلان له مخې د 'بپر جوای' په نامه سخت توپان په چټکۍ د دواړو هېوادونو ساحلي سیمو روان دی.

دواړو هېوادونو اټکل کړی چې سبا د جون ۱۵مه به دا سمندري توپان د پاکستان د سند او د هند ګجرات ساحلي سیمو ته ورسېږي.

که څه هم وار له مخه د دې توپان څپې او نښې د هند د ګجرات دوارکا ګمټي ګاټ سیمه کې لیدل شوي او د عیني شاهدانو په وینا د سمندر څپې په پرلپسې ډول لوړېږي.

دې ته په کتو، پاکستان او هند ویلي د خلکو د سر زیان مخنیوي په موخه یې د امکان تر کچې کوټلي ګامونه اخیستي.

پاکستان اعلان کړی چې ۶۴ زره کسان یې د توپان له زیانمنیدونکو سیمو خوندي ځایونو ته لېږدولي، هند هم د نږدې ۵۰ زره کسانو د لېږدولو عملیات بشپړ کړي دي.

د پاکستان د طبیعي پېښو اړوند مرکزي وزیرې شري رحمان په وینا د بپر جوای سمندري توپان به سبا پنجشنبه د سند ختیځو سیمو ته ورسېږي چې د نوموړې په وینا وار له مخه ورڅخه خلک خوندي ځایونو ته ویستل شوې دي.

اغلي شیري رحمان په اسلام اباد کې یوې خبري غونډې ته د وینا پر مهال وویل، له دې سیمو لېږدول شوې شاوخوا ۶۵ زره کسان یې په ۳۶ کمپونو کې ځای پر ځای کړي.

د نوموړي په وینا کراچۍ ته څه ګواښ نه دی ورپېښ خو په باور یې د دې توپان له کبله ځینې الوتنې ځنډیدای شي.

پاکستان له خلکو او کب نیونکو غوښتي چې تر څو راتلونکو ورځو سمندر ته له تللو په کلکه ډډه وکړي.

بل خوا، هندي چارواکو ویلي له دې کبله تر اوسه د ۶۹ رېل ګاډو پلان شوې سفرونه لغوه شوې او په وینا یې ګجرات کې یې بیړنی حالت اعلان کړی دی.

وروستۍ راپور دا دی چې په عرب سمندرګي کې د بپر جوای په نوم سمندري توپان په څپو کې څه کموالی راغلی خو لا هم په تدریجي بڼه دا توپان د پاکستان او هند ساحلي سیمو په لور روان دی.

دا توپان اوس له ساحلي سیمو په ۳۰۰ کیلومتره واټن ښودل کېږي.