د تهران میټرو کې 'بېهوښه' شوې نجلۍ؛ د المان وزیرې دا د نه منلو وړ پېښه بللې
د عکس سرچینه، IRNA
هغه شپاړلس کلنه ایرانۍ نجلۍ لا هم روغتون کې د کوما په حالت کې بستري ده چې فعالان وایي ایراني پولیسو د حجاب نه لرلو له امله وهلې ده. د جرمني د بهرنیو چارو وزیرې ویلي، له دې نجلۍ سره د ایراني پولیسو دا وړ چلن د زغملو نه دی.
انالینا برباک په X (پخواني ټویټر) کې لیکلي چې "یو ځل بیا په ایران کې یوه ځوانه نجلۍ د خپل ژوند لپاره جګړه کوي ځکه چې ویښتان یې ښکاره شوي. دا وايي "دا د زغم وړ نه ده."
دا زده کوونکې د تېرې یکشنبې پر ورځ د تهران د شهدا میټرو سټیشن کې میټرو ته پورته کېدو سره سم بې هوښه شوې وه او اوس د هوايي ځواکونو "فجر" نومي روغتون کې بستر ده.
ویل کېږي هغه روغتون کې تر جدي څار لاندې او په کوما حالت کې ده.
"ایرنا" خبري اژانس د دې پېښې ویډیو خپره کړې. د تهران د میټرو یا ځمکې لاندې ریل ګاډي مشر مسعود درستي وايي دا نجلې ښايي د ویني فشار ټیټېدو له امله بې هوښه شوې وي.
خو دا چې ریل ګاډي کې دننه څه پېښ شوي ، د هغې په اړه ویډیو نشته.
د مهسا امیني د پېښې تکرار
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 1
ایرنا خبري اژانس د دې نجلۍ د مور او پلار مرکه هم خپره کړې ده. مور یې چې په ځنډ او کراره یې خبرې کولې وویل، فکر کوي د لور فشار یې ټیټ شوی. بیا وايي "نه پوهېږم څه.. " بیا وايي ورته ویل شوي چې د فشار ټیټېدو له امله یې لور لوېدلې او سر یې د میټرو پر ژۍ/غاړه لګېدلی.
د ایران حکومت مخالفینو او فعالانو د جرمني د بهرنیو چارو وزیر څرګندونو پر ایکس بیا خپرې کړي. دوی دا د مهسا امیني له پېښې سره ورته بللې ده. مهسا هغه نجلۍ وه چې پرووسږکال د پولیسو په توقیف کې مړه شوه.
پولیسو ویلي وو هغې سم حجاب نه و مراعات کړی. کورنۍ یې وايي هغه د پولیسو د وهلو له امله مړه شوې، خو پولیس دا ردوي.
د ایران حکومت ضد یوه انټرنېټي سایټ "هنګاو" لیکلي چې په دې تازه پېښه کې د حجاب څار لپاره ځانګړو پولیسو دا نجلۍ وهلې ده او اوس په کوما حالت کې ده، خو د ایران د میټرو مشر ویلي هلته د وهلو ټکولو پېښه نه ده شوې.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 2
د هغه روغتون شاوخوا کې چې دا نجلۍ په کې بستر ده، سخت امنیتي تدابیر نیول شوي دي. د یوې ځايي ورځپاڼې خبریال وروسته له هغه د څو ساعتونو لپاره ونیول شو چې د هوايي ځواک روغتون ته د رپوټ جوړولو لپاره ورغلی و.
ایران کې د هغو دوه خبریالانو محاکمه لا هم روانه ده چې د مهسا امیني په اړه یې رپوټ جوړ کړی و او د هغې له مور او پلار سره یې مرکه کړې وه.
د مهسا امیني له مړینې وروسته د ایران لر او بر کې حکومت ضد پراخ بې سارې لاریونونه پيل شول.
دا لاریونونه چې تر ډېره د ښځو ونډه په کې پراخه وه د حکومت له خوا سخټ وځپل شو او په ترڅ کې یې څه د پاسه پنځه سوه کسان ووژل شول. زرګونه نور ټپيان او یا زندان ته واچول شول.
