ايساف وايي دوى شاوخوا ١٠٠ کيلوگرامه اوومه کوکنار نيولي دي

د ايساف له لورې په خپرې شوې يوې اعلاميې کې ويل شوي دي چې د هلمند په مرکز لشکرگاه کې يې ١٠٠ کيلوگرامه اوومه کوکنار په روانه اوونۍ کې نيولي دي .

اعلاميه وايي چې دغه عمليات يې له استخباراتي معلوماتو وروسته ترسره کړي دي او د يو ميليون امريکايي ډالرو په ارزښت توکي يې نيولي دي .

په دې وروستيو کې ملگرو ملتونو په افغانستان کې له مېشتو نړيوالو ځواکونو غوښتي و چې د مخدره توکو د قاچاق او کر په مخنيوي کې مرسته وکړي .

د هلمند په ولايت کې څو مياشتې وړاندې هغه مهال د ايساف پر ځواکونو نيوکې وشوې چې پر ځايي راډيوگانو کې يې اعلانونه خپارۀ کړل او بزگرانو ته يې ډاډ ورکړ چې د کوکنارو پر کرکيلې يې دوى کار نه لري .

ايساف له هغو نيوکو وروسته اعلان ليرې کړ او تيروتنه يې وبلله .

ملگري ملتونه او ډيرې نورې ادارې په دې باور دي چې له مخدره توکو څخه طالبان مالي گټه ترلاسه کوي .

ايساف د ډيرو په گومان تر اوسه ځکه په دې برخه کې کار نه و کړى چې د ځايي بزگرانو او خلکو د زړۀ او ذهن د گټلو په لار کې يې دغه ډول گام خنډ بالۀ .