متين سمسور له کابله

	افغان چارواکي وايي د کوکنارو په مبارزه کې د نړيوالې ټولنې نه همغږۍ د نشه يي توکو په ضد هلې ځلې بې اغېزې کړې

د کورنيو چارو مرستيال وزير جنرال داود داود همدا ددې يولامل بولي چې وايي د نشه يي داروگانو په وړاندې روانه مبارزه له ستونزو سره مخامخ ده .

دا څرگندونې له هغه يوه ورځ وروسته کيږي چې د نړۍ اتو پر مختللو صنعتي هيوادونو په افغانستان کې د نشه يي داروگانو په وړاندې له شويو کارونو ناخوښې وښوده .

د نشه يي داروگانو د کر او قاچاقو د مخنيوي پورې تړلي يو شميرافغان چارواکي له تېر سره په پرتله، په روان کال کې د کوکنارو د اړولو او د نشه يي دارو گانو د قاچاق کوونکو د نيولو په برخه کې د پرمختگ خبره کوي . دوى وايي توانېدلي چې شاوخوا ٢٥٠٠٠ هکتاره ځمکه له کوکنارو پاکه کړي او د نشه يي داروگانو په قاچاقو کې ښکېل په لسگونو کسان ونيسي .

خو څنگه چې دکورنيو چارومرستيال وزير جنرال داود داود وايي د شتو امنيتي ستونزو له کبله د افغانستان په يو شمير سويلي او ختيځو ولايتونو کې د کوکنارو په کر کې زياتوالى راغلى دى .

هغه وايي: ''هلمند او د هيواد يو شمير ختيځ ولايتونه چې تراوسه ځانگړي شوي نه دي ، هغه سيمې دي چې په روان کال کال کې د کوکنارو کر پکې زيات شوى. خو مهم پکې هلمند ولايت دى چې ښايي کرل شوي کوکنار پکې د هغو هڅو انډول خراب کړي چې په هيواد کې دکوکنارو د له منځه وړ لو په برخه کې ترسره کيږي.''

د نشه يي داروگانو په وړاندې په روانه مبارزه کې د پرمختگونو او ستونزو په اړه افغان چارواکي له هغه وروسته څرگندونې کوي چې د نړۍ پرمختللو هيوادونو په دې هيواد کې د نشه يي داروگانو په وړاندې له روانې مبارزې څخه ناخوښي ښودلې ده .

	تېر کال په افغانستان کې د نشه يي توکو په توليد کې په سلو کې ٦٠زېاتوالى راغلى و. سږ کال هم اټکل نه کيږي چې دغه کچه دې ټيټه شي.

ښاغلى داود د جي _ ٨ (G-8) هيوادونو ددغې انديښنې په تړاو د غبرگون په ترڅ کې نړيوالو ته گوتڅنډنه وکړه چې دده په وينا د نشه يي داروگانو په وړاندې مبارزه کې واحده تگلاره نه لري .

هغه وويل: ''په افغانستان کې ښکيل د نړۍ شاوخوا ٣٦ هيوادونه د نشه يي داروگانو په برخه کې گډه تگلاره نه لري او تگلارې يې سره بيلې دي چې ښايي د ستونزو يو له لاملونو څخه هم همدا وي. هيله لرو چې دوى په دې برخه کې خپلې تگلارې سره همغږي کړي.''

د نشه يي داروگانو په وړاندې دمبارزې دغه افغان چارواکى په دې برخه کې د شته ستونزو پړه پردې هم اچوي چې وايي نړيوالو په دې برخه کې کافي مرستې او پاملرنه نه ده کړي .

خو دنشه يي داروگانو په وړاندې د مبارزي په پاتې راتلو کې يو شمېر کارپوهان بيا د پړې گوته خپله افغان حکومت ته نيسي. دوى وايي حکومت نه دى توانېدلى چې ادارې فساد ورک او د نشه يي داروگانود غټو قاچاق کوونکو په وړاندې چې ويل کيږي يو شمير حکومتي چارواکي هم پکې ښکيل دي، اغيزمن گامونه اوچت کړي .

تېر کال په افغانستان کې د نشه يي داروگانو په توليد کې په سلو کې ٦٠زېاتوالى راغلى و او اټکل نه کيږي چې سږ کال دې دغه کچه ټيټه شي.