محمد الياس وحدت په خوست کې

	په پکتيا کې پر ناټو ځواکونو د چاودنې په اړه د طالبانو او دغو ځواکونو سرچينو خبرې ضد او نقيض دي

په پکتيکا ولايت کې چارواکي وايي د زېړوک-اورگون پر جوړېدونکي سړک يوې چاودنې د يوۀ خصوصي امنيتي شرکت شپږ وسله وال ساتونکي وژلي دي.

د پکتيکا والي، اکرم خپلواک، وايي دغه کسان هغه مهال ووژل شول چې پر گاډي يې د سړک د غاړې ښخ شوى بم وچاودېد.

د بريد پړه تر اوسه چا پر غاړه نه ده اخيستې، خو پخوا د دغه ډول ډېرى پېښو مسوليت وسله والو طالبانو منلى دى.

د زېړوک-اورگون سړک د بيا رغولو په حالت کې دى او د خصوصي شرکت دغو وسله والو کسانو د جوړونې د بهير ساتنه کوله چې پرې چاودنه وشوه.

په يوه بله پېښه کې، د همدې ولايت په سرحدي ولسوالۍ، برمل، کې توغندي لگېدلي او يو سړى يې وژلى. ښاغلي خپلواک وويل توغندي د ډيورنډ کرښې له پاکستانۍ غاړې څخه راويشتل شوي چې يو ولسي سړى يې وژلى او يو يې ژوبل کړى.

په درېيمه پېښه کې، په اورگون کې د ناټو ځواکونو يو کاروان د سړک د غاړې د بم د چاودنې ښکار شوى، خو د دغو ځواکونو چارواکي وايي يوازې دوه سرتېري يې ټپيان شوي.

وسله وال طالبان وايي په بريد کې يې د ناټو گڼ سرتېري له منځه وړي.
خو په سويل ختيځه سيمه کې د ناټو يو وياند، جگړن کورپي، وايي دغې چاودنې د دوى دوه پوځيان ټپيان کړي او د دوى گاډى يې ويجاړ کړى.

په څنگلوري پکتيا ولايت کې د ښواک پر ولسوال بريد شوى، دى خپله ټپي شوى او دوه ساتونکي يې وژل شوي دي. د ولسوال امير محمد يو بل ساتونکى ټپي شوى هم دى.

د پکتيا د امنيت مشر غلام دستگير روستميار وايي ولسوال نن (يکشنبه) سهار کورته روان و چې ناپېژانده وسله والو کسانو يې پر گاډي بريد وکړ.

د افغانستان په سويل او سويل ختيځې سيمو کې تاوتريخوالى په وروستيو مياشتو کې په پراخه کچه زيات شوى.