د وسله والو طالبانو په وروستيو بريدونو کې د افغان پوليسو په مرگ ژوبله کې د پام وړ زياتوالى راغلى

سيمه ييز امنيتي چارواکي وايي نن (چارشنبه) سهار وسله والو د پوليسو او نړيوالو ځواکونو پر يوۀ کاروان بريد وکړ او درې تنه پوليس يې ووژل. يو ملکي موټر چلوونکى هم وژل شوى.

دغه امنيتي گډ امنيتي کاروان د هغه لوړپوړي حکومتي پلاوي ساتنه کوله چې د وزې ځدراڼ ولسوالى ته پرلارې و. په پلاوي کې د ولسمشر کرزي دوه سلاکاران او د پکتيا والي هم وو.

د پکتيا د پوليسو مشر، غلام دستگير روستميار، بي بي سي ته وويل د وسله والو طالبانو په کمين کې چې د گردېز - خوست پر لويه لاره شوى بهرنيو ځواکونو ته زيان نه دى اوښتى.

خو وسله والو طالبانو ادعا کړې چې په بريد کې يې د افغان او بهرنيو ځواکونو درې گاډي ويجاړ کړي او 'گڼ شمېر' سرتېري يې ور وژلي دي.

د افغانستان په سويل ختيځو ولايتونو کې په وروستيو مياشتو کې د حکومت د مخالفو وسله والو او نړيوالو او افغان ځواکونو تر منځ نښتې زياتې شوې.

ناټو ځواکونو ددغې مرگ ژوبلې لامل د سړک د غاړې بمي چاودنه بللې، خو په کندهار کې امنيتي چارواکي او وسله وال طالبان وايي پر کاناډايي ځواکونو تېره شپه په ژېړۍ ولسوالۍ کې ځانمرگى بريد شوى.

لومړى د ناټو ځايي وياندانو د ژوبلو شويو شمېره دوه سرتېري ښودله، خو کاناډايي رسنيو ته يې د خپل هېواد پوځي چارواکو د څلورو پوځيانو د ټپي کېدلو پخلى کړى.

کندهار له هلمند وروسته د افغانستان دويم تر ټولو ناامنه ولايت دى چې د زياتېدونکو بريدونو او چاودنو شاهد دى.