افغان چارواکي:له تاجیکستان سره پر پوله '' درقد '' مو بېرته نیولې
د افغانستان شمال کې چارواکي وايي، د امو سیند منځ کې پروت ټاپو ''درقد'' کنترول یې بېرته تر لاسه کړی دی.
د تخار والي ویاند سنت الله تیمور بي بي سي ته ویلي، تېره شپه ' جنورۍ ۹ ' حکومتي ځواکونه دغې مهم ستراتیژیک ټاپو ته ننوتل او وايي اوسمهال حکومتي ځواکونه د ولسوالۍ په مرکز کې ځای پر ځای شوي دي.
د نوموړي په وینا څو راتلونکو ساعتونو کې به پوځي او ملکي چارواکي په رسمي مراسمو کې د افغانستان ملي بېرغ د ولسوالۍ پر ودانیو ورپوي.
نوموړی وايي په سیمه کې د حکومتي کارکونکو لپاره د چارو پیلولو زمینه برابریږي.
د تخار والي ویاند وايي، د درقد بېرته نیولو په عملیاتو کې د وسله والو طالبانو له ۴۰ ډېر وسله وال وژل شوي دي او وايي په سیمه کې د پاتې وسله والو لټون روان دی.
دوې ورځې مخکې د افغان کوماندو ځواکونو په ګډون د ''درقد'' بېرته نیولو لپاره عملیات پیل شول.
چارواکي وايي د افغان پلیو ځواکونو قومندان جنرال مراد علي مراد د دغو عمیلاتو مشري کوله.
نوموړي په یوه خبري غونډه کې وویل:
'' نن سهار وختي شاوخوا پنځه بجې د افغان ځانګړو ځواکونو د عملیاتو په پایله کې دغه ولسوالۍ په بشپړه توګه د دولتي ځواکونو لاس ته ولویدله. افغان ځواکونو کور په کور د پلټنې عملیات تر سره کړل.''
وسله والو طالبانو تر اوسه د ''درقد'' وضعیت په اړه د حکومتي چارواکو د څرګندونو غبرګون کې څه نه دي ویلي.
له تاجکستان سره پر پوله پرته ''درقد'' ولسوالي د تېرې اکتوبر میاشتې په ورستیو کې د طالبانو لاس ته ولویده.
