میدانښار کې د محکمې مخې ته ځانمرګي برید دوه پولیس وژلي
د عکس سرچینه، mw
د افغانستان پلازمېنې کابل په ګاونډ میدان وردګو ولایت میدانښار کې د محکمې مخې ته ځانمرګی برید شوی.
د کورنیو چارو وزارت ویاند صدیق صدیقي ویلي، د محکمې مخې ته ځانمرګي برید کې څلور ځانمرګي بریدګر او دوه پولیس وژل شوي دي.
د میدان وردګو مطبوعاتي دفتر واييو لومړی یوه ځانمرګي برید کوونکي د محکمې دروازه کې پر ځان پورې تړلي چاودېدونکي توکي چوولي او درې نور د امنیتي ځواکونو له خوا په ډزو ووژل شول.
سرچینه وايي، په دې برید کې هېڅ کوم ملکي وګړي او یا د محکمې کارکوونکو ته زیان نه دی اوښتی.
د وردګو د محکمې یوه قاضي فضل الرحمن امیري بي بي سي ته وویل، د سې شنبې په ورځ (مې ۲۶) غرمه شاوخوا ۱۱ بجې برید کوونکي غوښتل محکمې ته ننوځي، خو کله یې چې مخه ونیول شوه، پر ځان پورې تړلي چاودېدونکي توکي یې وچوول.
نوموړی وايي، له چاودنې وروسته بهر ډزې پیل شوې، چې دا خبره د والي ویاند عطاء الله خوږیاڼي هم تایید کړې، خو نور جزییات یې نه دي ورکړي.
سرچینه وايي، په نښه شوې محکمه استیناف او ښاري محکمه ده.
د محکمې ودانۍ ته څېرمه د ښځو چارو ریاست او د والي دفتر پراته دي.
تر اوسه د برید پړه چا پر غاړه نه ده اخیستې.
