کابل کې ځانمرګي ۳ وژلي او له ۳۰ زيات ټپيان کړي
د عکس سرچینه، Reuters
د افغانستان په پلازمېنه کابل کې نن سهار (نوامبر ۱۶) د یوه ځانمرګي برید په ترڅ کې ۳ ولسي وګړي وژل شوي او ۳۲ نور ټپیان دي.
دغه برید د کابل په لویدیځه برخه کې د افغانستان ملي شورا ودانۍ ته نژدې تر سره شوی.
د کابل د پولیسو ویاند حشمت ستانکزي بي بي سي ته وویل، دغه پېښه نن سهار شاوخوا ۱۰ بجې د شپږمې حوزې اړونده سیمه دارالامان پر سرک شوې، چې په ترڅ کې ۳ کسان وژل شوي او ۳۲ نور ټپیان دي.
د دغه برید موخه د ولسي جرګې غړې شکریې بارکزۍ موټر و چې د نوموړې او موټر چلوونکی يې د ټپیانو په ډله کې شامل دی. د افغانستان ولسي جرګې غړې شکریه بارکزۍ له دغه بریده روغه وتلې، چې مخامخ پرې وشو.
ځانمرګي برید ګر، هغه موټر ته چې له چاودېدونکو توکو ډک کړی و، د ملي شورا ودانۍ ته نژدې د مېرمن بارکزۍ موټر ته څېرمه پر یوه فرعي سړک چاودنه ورکړه.
د عکس سرچینه، b
حکومتي او د روغتون چارواکي وايي، مېرمن بارکزۍ دغه برید کې برسیرنه ټپي شوې ده او هغه رپوټونه یې هم رد کړي، چې ګواکې د نوموړې د کورنۍ کوم کس دغه برید کې وژل شوی دی.
کابل پولیسو دغه پېښه تایید کړې او وايي، چې دا یوه لویه چاودنه وه. د کورنیو چارو د وزارت ویاند صدیق صدیقي په خپله ټویټر پاڼه کې لیکلي و، چې په دغه پېښه کې شکریه بارکزۍ ته زیان نه دی رسېدلی، خو وايي ۳ ولسي وګړي وژل شوي دي او ۱۷ نور ټپیان دي.
د افغانستان د ملي شورا یوې وکیلې هیلۍ ارشاد بي بي سي ته وویل، چې دغه پېښه کې د ملي شورا غړې شکریې بارکزۍ موټر په نښه شوی دی.
مېرمن هیلۍ چې د امنیت له روغتونه یې بي بي سي سره د تلیفون په کرښه خبرې کولې د مېرمن بارکزۍ د روغتیا په اړه یې وویل، چې نوموړې یو څه ټپي شوې.
سیمه ییزو رسنیو په دغه پېښه کې د یو شمېر زده کوونکو ټپي کېدو خبر ور کړی.
د دغې پېښې مسولیت تر دې دمه کومې ډلې پر غاړه نه دی اخیستی.
