کابل کې د 'مدرسه' فلم نندارې ته وړاندې شو
د شنبې په ورځ (جولای ۶/چنګاښ ۱۵) د مدرسې په نوم فلم د افغان سینماګرو د هڅو او د ملي شورا د منځګړیتوب په پایله کې په کابل کې نندارې ته وړاندې شو.
دا فلم په ایران کې د یوې کډوالې کورنۍ انځور وړاندې کوي چې ښوونځي ته د خپلو ماشومانو د استولو په لاره کې ډېر کړاو ګالي.
د دې فلم جوړوونکی او لوبغاړی اسد سکندر وايي دا فلم د لیدونکي احساسات پاروي، له همدې امله د ده په وینا دوه کاله وړاندې په کابل کې د ایران د سفارت د فشار په پایله کې نندارې ته وړاندې نه شو، خو نوموړی وايي اوس دا ستونزه هواره شوې ده.
دوه کاله وړاندې د دې فلم د نندارې د مخنیوي له امله ډیر اعتراضونه او نیوکې وشوې او د افغانستان د اطلاعاتو او کلتور پر وزارت تور ولګید چې ګواکې ددې مخه یې د ایران په پلوي نیولې ده.
ښاغلی سکندر وايي په دې فلم کې یو لړ بدلونونه راوستي او د افغان سینماګرانو او د افغانستان د ملي شورا د یو شمېر غړو په هلو ځلو په پام کې ده چې نن نندارې ته وړاندې شي.
د دې فلم صحنې په هرات کې ثبت شوي دي او لوبغاړي یې افغانان دي.
