په کندهار او هلمند کې ۹ پولیس وژل شوي
د نارامه سوېلي ولایت هلمند په ګرشک ولسوالۍ کې وسله والو طالبانو د پولیسو پر يوې پوستې برید کړی، چې د رپوټونو له مخې شپږ پولیس پکې وژل شوي دي.
د برید پړه وسله والو طالبانو پر غاړه اخیستې ده.
د دغې ډلې یوه تن ویاند قاري يوسف احمدي رسنیو ته ویلي، برید د دوی جنګیالو کړی، چې په وینا یې ۷ پوليس پولیس پکې وژل شوي.
نوموړي ادعا کړې، چې په دې برید کې وسله والو طالبانو يو شمېر وسلې هم له ځانه سره وړې دي.
خو چارواکو د پېښې په اړه څه نه دي ويلي.
په سوېل کې د بي بي سي خبريال وايي، برید د ګرشک ولسوالۍ په دُرايي سیمه کې تېره شپه شوی دی.
سرچینه زياتوي چې له یادې سیمې یې د درو پولیسو مړي د کندهار روغتون ته لېږدولي دي.
بل خوا تېره شپه په کندهار کې نا وسله وال یو کس د جاسوسۍ په تور وژلی او مړی یې غورځولی دی.
رپوټونه وايي کله چې پولیس د هغه د مړي د رالېږدولو لپاره ورغلل، تر مړي لاندې يې ځای پر ځای شوی ماین وچاودېد، چې درې پولیس پکې ووژل شول.
د روانې اګست میاشتې پر ۱۷ مه د کندهار ښار په ۱۳مه حوزه کې شپږ افغان پولیس تر مسمومېدا وروسته په ډزو وژل شوي ول.
