نیمروز کې پر ګډه پوله د طالبانو او ایراني ځواکونو نښته؛ یو طالب وژل شوی، یو ژوبل دی
د عکس سرچینه، Getty Images
د افغانستان لوېدیځ نیمروز ولایت د کنګ ولسوالۍ سرحدي سیمه کې د یکشنبې پر ورځ د افغان طالبانو او ایران د پوله ساتو ځواکونو ترمنځ نښته کې د طالبانو یو امنیتي کس وژل شوی او یو بل ژوبلېدلی دی.
د طالبانو د حکومت د سرحدي ځواکونو یو غړی وایي، برید د ایراني ځواکونو له خوا لومړی پیل شو. د دغه سرچینې په خبره، دا څویم ځل دی چې ایراني ځواکونه پر دوی دا ډول بریدونه کوي.
د نیمروز ولایت د کنګ ولسوالۍ په دروېشک سیمه کې د طالبانو د حکومت سرحدي ځواکونه وایي، د ایراني ځواکونو بریدونو ته یې ځواب نه دی ورکړی او د خپلو مرکزي چارواکو پرېکړي او امر ته په تمه دي.
د طالبانو سرحدي ځواکونو مشر ابراهیم هېواد د بي بي سي سره خبرو کې وویل، ایرانی لوری تل دغه ډول کړنو باندې لاس پورې کوي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
ښاغلی هېواد زیاتوي ایراني پوله ساتي ځواکونه دا چاره د هغو افغانانو د مخنیوي په خاطر کوي، چې د ده په ټکو په ناقانونه توګه ایران ته ور اوړي.
په همدې حال کې د ایراني سرچینو د خبر له مخې د دغه هېواد د سیستان او بلوچستان ولایت په شمال کې د هیرمند ښار والۍ هم اعلان کړی چې سیمه کې پر ګډه پوله د ایران د اسلامي جمهوریت د پوله ساتو ځواکونو او افغان طالبانو ترمنځ نښته شوې ده.
ځینو رسنیو د سرچینو په حواله خبر ورکړی، چې طالبانو سیمې ته نور ځواکونه استولي دي او د تیارسي په حال کې دي.
له سیمي خپاره شوي انځورونه او ویډیوګانې ښیي، چي دواړو غاړو پر یو بل وسلې هم کارولې دي.
د عکس سرچینه، SOCIAL MEDIA
بي بي سي د جګړې له سیمې یو ویډیویي کلپ ترلاسه کړی. دې کلپ کې ښکاري چې د ایراني پوله ساتو ځواکونو لخوا ډزې کېږي او د راکټ یوه مرمۍ د یوې ودانۍ پر دېوال لګېږي.
یوه ځايي اوسېدونکي چې د طالبانو او ایراني پوله ساتو ځواکونو ترمنځ د نښتي انځورونه یې اخیستي، بي بي سي ته وویل، د دواړو خواو ترمنځ د جګړې لامل هغه سرحدي لانجه ده چې په افغانستان کې د تېر حکومت له وخته پاتې ده.
د دې سرچینې په وینا ځايي اوسېدونکو د ايراني پوله ساتو ځواکونو د بريدونو له وېرې خپل کورونه پرېښي دي.
