طالبانو کابل کې د خصوصي تلویزیون له درې نیول شویو خبریالانو 'دوه خوشي کړي'
د عکس سرچینه، TOLONEWS
په افغانستان کې د طلوع نیوز خصوصي ټلویزیون یوه مسوول تایید کړې، چې د طالبانو له خوا پرون د دغه ټلویزیون له دریو نیول شویو کارکوونکو څخه دوه یې بېرته خوشي شوي دي.
لطف الله نجفي زاده په یوه ټویټر پیغام کې ویلي، چې د طلوع نیوز خبري څانګې مشر خپلواک ساپی او د ټلویزیون حقوقي سلاکار له پوښتنو وروسته بېرته خوشي شوي، خو ویاند بهرام امان لاهم له طالبانو سره بندي دی.
طالبانو د دوی دنیول کېدو د لاملونو په اړه څه نه دي ویلي.
یوې باوري سرچینې له دې مخکې بي بي سي ته تایید کړه چې د طالبانو استخباراتو د طلوع نیوز درې کارکوونکي نیولي او "نامالوم ځای ته یې لېږدولي دي."
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 1
دا سرچینه وايي پرون (پنجشنبه) ماښام شاوخوا ۱۵ کسان چې ظاهرآ د طالبانو د استخباراتو ځواکونه وو، کابل کې د طلوع نیوز تلویزیون دفتر ته ننوتل، د دې شبکې رئیس خپلواک ساپی، ویاند بهرام امان او د دې تلویزیوني شبکې یو بل کارکوونکی یې ونیول.
طلوع نیوز په افغانستان کې له لومړنیو خصوصي خبري تلویزیوني شبکو ده چې له کلونو کلونو راهیسې د "موبې ګروپ" په اډانه کې فعالیت کوي.
دې شبکې او په ټوله کې د موبې ګروپ نورو رسنیو پر افغانستان د طالبانو له واکمنېدو وروسته هم له کابله خپرونو ته دوام ورکړ.
طلوع نیوز د طالبانو لخوا د کابل تر نیول کېدو دوه ورځې وروسته د ښځینه کارکوونکو په کوربتوب خپلې سیاسي او خبري خپرونې له سره پیل کړې چې دا موضوع هغه مهال خبرسازه شوې وه.
افغانستان لپاره د ملګرو ملتونو د مرستندویه ماموریت (یوناما) دفتر چې امنیت شورا یې همدا نن (پنجشنبه) ماموریت د یوه بل کال لپاره هم وغځاوه، د وسله والو کسانو لخوا د دغو خبریالانو په نیول کېدو اندېښنه ښودلې.
د یوناما د ټویټر په پوست کې ټینګار شوی چې دغه ژورنالیستان باید سملاسي خوشې شي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 2
طالبانو د کابل تر نیولو وروسته مخکې هم څو ځله کورني او بهرني خبریالان او مدني فعالان نیولي خو رسمآ یې د هغوي د نیولو مسئولیت په غاړه نه دی اخیستی.
دغه خبریالان او فعالان وروسته د نړیوالو فشارونو پایله کې بېرته خوشې شوي.
د بشري حقونو مدافع بنسټونه افغانستان کې د بیان ازادۍ د ځپل کېدو او د ژورنالیستانو په نیول کېدو اندېښنه ښيي.
په دې لړ کې تازه د افغانستان د خبریالانو مرکز د خبریال ورځې په مناسبت ویلي چې په افغانستان کې له نيمايي ډېرې خصوصي رسنۍ تړل شوې یا یې خپرونې محدودې کړې دي.
د دغه مرکز یوه مشر شاه محمود شینواري بي بي سي ته ویلي د دوی ارزونې ښيي چې د طالبانو دوره کې له خبریالانو سره تاوتریخوالی ډېر شوی.
هغه ویلي: "له خبریالانو سره تاوتریخوالی د تېر کال پر تله زیات شوی. خو د خبریالانو د وژل کېدو په برخه کې د اسلامي امارت له راتګ سره دا کچه ټيټه وه."
