طالبان: دوه نيول شوي بهرني وګړي خوشي شول

د طالبانو مرستيال وياند بلال کريمي بي بي سي پښتو ته د دوو نيول شويو خبریالانو خوشي کېدل تائيد کړي دي.

ښاغلی کريمي وايي، "دا بهرني اتباع چې ځانونه يې يوې نړيوالې موسسې ته منسوبول د دې لپاره چې پېژندپاڼې، جوازنامې او لازم اسناد يې نه لرل توقيف شوي وو، چې د هويت له تثبيت وروسته خوشي شول".

طالبانو دا دوه خپلواک بهرني خبریالان نژدې پنځه ورځې مخکې د هغوی له افغان همکارانو سره یو ځای په پلازمېنه کابل کې نيولي وو.

د ملګرو ملتونو د کډوالو ادارې (يو اېن اېچ سي ار) پر ټوېټر پاڼه د دغو دوو بهرنيو وګړو او د هغوی افغان همکارانو د خوشي کېدو له امله خوښي څرګنده کړې ده او له ټولو هغو چې اندېښنه يې ښولې کړې او د همکارې وړانديز يې کړی مننه کړې ده.

دې خبریالانو په افغانستان کې د ملګرو ملتونو کډوالو له ادارې 'یو این ایچ سي ار ' سره قراردادي دنده درلوده او په افغانستان کې یې دننه د بې ځایه شویو کسانو تصویرونه اخیستل.

له نیول شویو خبریالانو یو اندریو نورث دی، چې مخکې یې د بي بي سي لپاره کار کاوه او په افغانستان کې د طالبانو له واکمنېدو وروسته یې څو ځله افغانستان ته سفر کړی.

.