طالبان: د افغانستان شمال ختیځ کې د اورپکو روزنځایونه نشته، ' تښتېدلي کسان' ناسم معلومات خپروي
د عکس سرچینه، Getty Images
طالبانو د تاجکستان د ولسمشر امام علي رحمان هغه څرګندونې رد کړې چې ویلي یې و د افغانستان شمال ختيځو ولايتونو کې د اورپکو مرکزونه شته او تر شپږو زرو وسلوال په کې مېشت دي.
د طالبانو د ویاند مرستيال بلال کريمي وايي، دغو سيمو کې د اورپکو روزنځایونه نشته او په وينا يې د افغانستان له خاورې به هیچا ته ګواښ نه پېښیږي.
تېره دوشنبه د تاجکستان ولسمشر د ګډ امنيتي تړون سازمان غړو هېوادونو غونډې ته وويل، د دغه هېواد "د استخباراتو له مخې په ټوله کې د افغانستان په شمال ختيځو ولايتونو کې تر ۴۰ زيات د ترهګرو کمپونه او د روزنې مرکزونه موجود دي چې تر شپږ زره ډېر وسله وال په کې شته".
ښاغلي رحمان دغه راز د افغانستان شاوخوا د امنيتي کمربند د جوړولو وړانديز هم کړی دی.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
بل لور بلال کريمي همداراز ادعا کړې چې ګواکې له هېواده تښتېدلي وګړي نړیوالو او ګاونډیانو ته ناسم مالومات ورکوي او غواړي د طالبانو بد انځور وړاندې کړي.
ښاغلی کریمي ويلي طالبان له ټولو ګاونډیانو سره د ښو اړیکو غوښتونکي دی.
تاجکستان د افغانستان سره څه دپاسه ۱۳۵۰ کیلومتره پوله لري او وار وار یې په افغانستان کې د ناامنیو او جګړو په تړاو خپله اندېښنه څرګنده کړې ده.
د روسيې ولسمشر ولاديمير پوتين هم په دې وروستيو کې له افغانستانه سيمې ته د افراطي اسلامپالو د نفوذ په اړه خبرداری ورکړی دی.
که څه هم طالبانو وړاندې ویلي چې هغوی ټولو هېوادونو سره ښې اړیکي غواړي او نورو هېوادونو ته ګواښ نه پېښوي خو د افغانستان شمالي ګاونډیان په دې هېواد کې د مېشتو اسلامپالو د بریدونو په اړه اندېښنه لري.
