یونېسف د افغانستان لپاره 'د بل هر وخت پرتله د زیاتو' مرستو غوښتنه وکړه

په ملګرو ملتونو سازمان کې د ماشومانو ملاتړ ادارې یونېسف په خپل تاریخ کې د یوه هېواد لپاره د بل هر وخت پرتله د زیاتې مرستې غوښتنه کړې ده.

یونېسف په یوه اعلامیه کې ویلي، له ۲۴ میلیونه افغانانو سره یې چې نژدې نیمايي یې ماشومان دي، د بشري مرستو لپاره د دوه میلیاردو ډالرو بسپنې غوښتنه کړې ده.

یونېسف مسوولین اټکل کوي چې مناسبو خوړو، پاکو اوبو او د نظافت کافي وسایلو ته د نه لاسرسي له کبله به ۲۰۲۲ کال له هرو دوو افغان ماشومانو یو په خوار ځواکۍ اخته وي.

یونېسف مسوولین هیله من دي چې د مرستې دغه دوه میلیارده ډالر به په افغانستان کې د ماشومانو او کورنیو لپاره د روغتیا، خوراک، نظافت او زدکړو برخو کې د خدمتونو لړۍ له سملاسي ویجاړېدو وژغوري.

د افغانستان لپاره د یونېسف استازې الیک اکونګا په دې هکله په یوه پیغام کې وویل:

''په افغانستان کې اوسنی بشري وضعیت په ځانګړي ډول د ماشومانو لپاره سخت اندېښمنونکی دی. ژمی وار له مخه رارسېدلی دی او له اضافي مالي مرستو پرته به یونېسف او مرستندویه ادارې و نه. توانېږي هغو ماشومانو او کورنیو ته د (مرستې) لپاره ورسېږي، چې موږ ته تر بل هر چا زیات اړ دي. ''

د ملګرو ملتونو دا چارواکي وېره څرګندوي چې دا مهال میلیونونه افغان ماشومان د لوږې او ان مړینې له خطر سره مخامخ دي.

نوموړې زیاتوي دوی هڅه کوي چې له هرې شونې لارې له هغو افغان ماشومانو سره مرستې وکړې چې د هېواد په ښوونځیو کې د څښاک پاکو اوبو او نظافت نشتوالي له کبله د تاوتریخوالي له خطر سره مخامخ دي.

د یادونې ده، چې تېره اونۍ نړیوال بانک کې د افغانستان بیا رغاونې صندوق 'اې ار ټي ایف ' په افغانستان کې د بشري ناورین مخنیوي لپاره په دې څانګه کې د افغانستان له یو اعشاریه پنځه میلیارده کنګل شوې شتمنۍ د ۲۸۰ میلیونو ډالرو خوشي کول تایید کړل.

د سرچینو له قوله ویل شوي و، چې دا ۲۸۰ میلیونه ډالر به د خوړو نړیوال سازمان او د ماشومانو ملاتړ لپاره د ملګرو ملتونو ادارې یونېسف ته په افغانستان کې د بشري مرستو لپاره ورکړل شي.