له افغانستانه د خلکو ایستلو لړ کې د بریتانیا پر بهرنیو چارو وزارت د 'بې پروګرامۍ او ګډوډۍ' تورونه ولګېدل، خو حکومت دا تورونه رد کړي

د بریتانیا بهرنیو چارو وزارت یوه مخکیني کارکوونکي پر یاد وزارت تور پورې کړی، چې له افغانستانه د هغو کسانو ایستلو پروګرام یې ''کډوډ او بې ګټې '' و چې د طالبانو له واکمنېدو وروسته یې په هېواد کې ژوند له خطر سره مخامخ و.

رافایل مارشال چې په سپتمبر میاشت کې یې د ګوښه کېدو تر مهال د بریتانیا په بهرنیو چارو وزارت کې پر مهمه دنده فعالیت کاوه وايي، د وزارت په بېړنۍ څانګه کې کارکوونکي لږ دي او د هغو افغانانو انتخاب چې له هغه هېواده په بریتانوي الوتکو کې تر سره کېدل، ''بې پروګرامه او ګډوډ '' و.

د بریتانیا بهرنیو چارو وزارت دې پخواني مقام د خپل هېواد پارلمان کې د بهرنیو اړیکو کمېټې ته ویلي، احتمالاً داسې ۱۵۰۰۰۰ افغانانو له خپل هېواده د وتلو غوښتنلیکونه وړاندې کړي وو، چې له بریتانیا سره د اړیکو له کبله له خطر سره مخامخ وو، خو په وینا یې له پنځه سلنې هم لږ دغه ډول کسانو سره مرسته شوې ده.

نوموړی زیاتوي: ''څرګنده ده، ځینې هغه کسان چې ځای پر ځای پرېښوول شوي وو، د طالبانو له لاسه وژل شوي دي. ''

رافایل مارشال په خپله شاهدۍ کې د بریتانیا هغه مهال بهرنیو چارو وزیر ډومېنیک راب هم تورن کړ، چې په وینا یې پرېکړه کولو کې یې ''تګلاره پڅه '' وه.

د نوموړي په وینا د ښاغلي راب له لوري به یې د برېښنالیکونو ځواب ته تر ساعتونو پورې انتظار کاوه او په خبره یې داسې فکر کوي چې بهرنیو چارو وزیر ''په بشپړه توګه وضعیت نه و درک کړی. ''

د یادونې ده، چې د کابل د سقوط پر مهال ښاغلی راب په رخصتۍ تللی و او هغه مهال هم د بریتانیا اپوزیسیون ګوندونو پر نوموړي نیوکې کړې وې، چې په وینا یې لندن ته د ستنېدو او د وضعیت څارنې پر ځای هماغسې د رخصتۍ په حال کې پاتې شوی و.

د بریتانیا حکومت ویندوی د رافایل مارشال څرګندونو ته غبرګون کې ویلي، د بهرنیو چارو وزارت کارکوونکو ''په نه ستړې کېدونکې توګه د خپل ډول تر ټولو ستر ماموریت په تر سره کولو کې '' هڅې کړې دي.

ښاغلي راب ته یوې نژدې سرچینې ویلي، هغه وخت د هغو کسانو د هویت تایید او بهر ته په خوندي توګه لېږد د چټکو پرېکړو پر ځای مهم مسایل بلل کېدل.

دا سرچینه وايي، پر افغان پلازمېنه د طالبانو له واکمنېدو وروسته بریتانیا ۱۵۰۰۰ کسان د هوايی عملیاتو له لارې له افغانستانه وایستل چې ۵۰۰۰ بریتانویان، ۸۰۰۰ افغانان او ۲۰۰۰ ماشومان پکې شامل وو.

د بریتانیا حکومت یوې سرچینې په وینا رسماً له افغانستانه د خلکو ایستلو عملیاتو له پای ته رسېدو وروسته هم دې لړۍ دوام کړی، بریتانیا نژدې ۳۰۰۰ کسان له دې هېواده ایستلي او دا لړۍ لا هم روانه ده.